Qazaqstanda jedel aýrýhana salý tájiribesi turǵyn úi salýda da qoldanylady. Bul týraly BI Group kompaniiasynyń basshysy Aidyn Rahymbaev aityp berdi, dep habarlaidy QazAqparat.
Jýrnalister kompaniia basshysyna aýrýhana salýdaǵy jedel tehnologiialar turǵyn úi qurysynda qoldanyla ma dep suraq qoiǵan edi.
«Iá, bul zaýytty jazda ashyp (Modýl shyǵaratyn «Modex» zaýyty - red.), mamyr-maýsym ailarynda jańa turǵyn úi qurylysyn bastaýymyz kerek edi. Bul tehnologiia 16 qabattyq turǵyn úidi úsh aida salýǵa, barlyq óńdeý júrgizip, kiltin berýge múmkindik beredi. Bul zaýytty turǵyzýdy bir jyl buryn bastap edik, qazir kádege jaraǵanyna qýanyshtymyz», - dedi Aidyn Rahymbaev tilshilerge bergen suhbatynda.
«Bul - eń jańa tehnologiia, zaýytty keiinirek iske qosamyz. Osy zaýyt qurylys alańynda 8-10 adammen ǵana ǵimarat turǵyzýǵa múmkindik beredi. Qazirgi qurylysqa árbir kompaniiadan komandalar keldi. Sebebi, Úkimet tapsyrmasymen bul aýrýhanany tezirek turǵyzýymyz kerek», - dedi Aidyn Rahymbaev.
Sonymen birge, spiker merdigerlerdiń kómegi úshin rizashylyq bildirdi.
«Kún saiyn «Qandai kómek kerek?» dep habarlasyp jatqandar bar. Keshe «Semei-Tsement» direktory habarlasyp, materialdy eki ese tómendetilgen baǵada jetkizýdi usyndy. Merdigerler de kómek usynyp, jii habarlasady», - dedi A. Rahymbaev.
Eske sala ketsek, búgin elordalyq jýrnalister COVID-19 virýsyn juqtyrǵandardy jatqyzýǵa arnalǵan gospital qurylysymen tanysty.
3 sáýirde TJ rejimin qamtamasyz etý jónindegi memlekettik komissiia Qazaqstannyń úsh iri qalasynda juqpaly aýrýlar aýrýhanalaryn salýdy uiǵardy. Onyń qurylysyna tez turǵyzylatyn qurylymdar qoldanylmaq.
