Qazaqstanda jatyr moiny qaterli isigimen aýyratyndar jyl saiyn kóbeiip keledi. Bul týraly QR Densaýlyq saqtaý ministrliginiń bas onkolog dárigeri, Qazaq ulttyq onkologiia jáne radiologiia institýtynyń direktory Diliara Qaidarova Instagram paraqshasynda ótken tikelei efirde aitty, dep habarlaidy QazAqparat.
«Jatyr moiny qaterli isigi 100% emdeledi. Dúniejúzi boiynsha alyp qarasaq, jatyr moiny qaterli isigi aýrýy azaiyp keledi. Ókinishke qarai, sońǵy 12 jyl boiy skrining júrgizip kele jatqanyna qaramastan Qazaqstanda bul dertpen aýyratyndar sany azaimai tur, kerisinshe kóbeiip keledi. Bir qýantatyny – aýrýdyń alǵashqy satyda anyqtalý jaǵdaiy kóbeidi. Áielderdiń 80%-y bizge aýrýdyń alǵashqy satysynda keledi. Mundai jaǵdaida organdy saqtap qala otyryp ota jasaimyz jáne ómiriniń uzarýyna múmkindik týady. Áielge ota jasaǵan kezde jatyr moinyn saqtap qala alsaq – arada 5 jyl ótkende bala kóterýine ruqsat ete alamyz», - deidi Bas onkolog dáriger Diliara
Sondai-aq, ol pandemiia jatyr moiny qaterli isigin anyqtaýǵa qalai áser etkenin aitty.
«Pandemiia kezinde emhanalardyń bári jabyq boldy. Kóptegen adam skriningten ótýge bara almady. Ótken jyldyń qyrkúiek aiynda koronavirýsqa qatysty jaǵdai turaqtalǵan kezde biz aimaqtardy aralap, skrining ótýge shaqyrdyq. Qazirgi ýaqytta tekserilgender qatary 70% ǵana qamtyldy. Emhanada aldyn ala jazylyp, skriningten ótýlerińizdi suraimyn. Koronavirýs – infektsiia, biz odan qalai qorǵaný kerek ekenin bilemiz, al qaterli isikke qatysty jaǵdai basqasha. Mindetti túrde ýaqytyly tekserilip otyrýymyz kerek», - deidi ol.
