«Jastarǵa arnalǵan jaldamaly páter» aýqymdy jobasy aiasynda 2021 jylǵa deiin 9 myńǵa tarta páter beriledi. Bul týraly OKQ-da ótken baspasóz máslihatynda QR Aqparat jáne qoǵamdyq damý ministrliginiń jastar jáne otbasy isteri komitetiniń tóraǵasy Shahmardan Baimanov aitty, dep habarlaidy QazAqparat.
«Qazaqstanda jumyssyzdardy, onyń ishinde jastardy qoldaý maqsatynda birqatar memlekettik baǵdarlama iske asyrylyp keledi. Eń negizgisi - nátijeli jumyspen qamtýdy jáne jappai kásipkerlikti damytýdy kózdeitin «Eńbek» baǵdarlamasy. Bul baǵdarlamaǵa jastardyń 33%-dan astamy, iaǵni 172 myń azamat qatysady. Atalmysh baǵdarlamaǵa áleýmettik jumys oryndary da kiredi. «Jastar tájiribesi» baǵdarlamasy boiynsha 20 myńnan astam adam, al qoǵamdyq jumystarǵa 15 myńnan astam adam qatysty. Sondai-aq, «Biznes Bastaý» jobasy bar. Onyń aiasynda kásipkerlik negizderin 5 myńnan astam azamat oqydy. 900-den astam adam óz isin bastady. Búgingi tańda 4600 adam biznes-ideialaryn júzege asyrý úshin shaǵyn grant aldy, al 3400-den astam adam qysqa merzimdi kýrstan ótti», - dedi spiker.
Sonymen birge «Jasyl El» baǵdarlamasy boiynsha 11 myńnan astam azamat oqytylǵan. Odan bólek elimizde «Diplommen aýylǵa» baǵdarlamasy júzege asyrylýda. Ol boiynsha 16 mlrd teńgege 3 myńnan astam adam turǵyn úi satyp alý úshin biýdjettik nesie alǵan. «Serpin» baǵdarlamasy boiynsha jastar soltústik aimaqtarda oqyp jatyr.
«Pandemiiaǵa bailanysty árine belgili bir qysqarý bar, biraq tutastai alǵanda memleket halyqtyń, onyń ishinde jastardyń turaqtylyǵyn qamtamasyz etýge baǵyttalǵan sharalardy iske asyrýda. Jastar tehnikalyq arnaiy bilim alatyndai granttar bólinedi. Aimaqtyq baǵdarlamalar da júzege asyrylyp jatqanyn da aita ketý kerek. Jastar jyly aiasynda «Jastarǵa arnalǵan jalǵa beriletin turǵyn úi» jobasy júzege asyryldy. Nur-Sultan, Almaty jáne Shymkent qalalarynda ótken jyly 3 myń páter bólindi. Jalpy 2021 jylǵa deiin bul baǵytta 9 myń páter bólý josparlanyp otyr. Oblystyq deńgeide 5546 páter jas otbasylarǵa berildi. Meniń oiymsha, bul jastarǵa jaqsy múmkindik bergen jaqsy jobalar», - dep túiindedi sózin Shahmardan Baimanov.
