Sýret: Aqorda
Qazaqstan Respýblikasynyń Prezidenti «Oiyn biznesi, lotereia qyzmeti, densaýlyq saqtaý, memlekettik eńbek inspektsiiasy, memlekettik baqylaý jáne artyq zańnamalyq reglamentteýdi bolǵyzbaý máseleleri boiynsha» zańǵa qol qoidy. Bul týraly Aqordanyń baspasóz qyzmeti habarlady.
Negizgi ózgerister:
1. Oiynǵa táýeldilikti tómendetý:
- - Qumar oiyndarǵa jáne bás tigýge tyiym salynǵan adamdardyń tizimi keńeitildi. Endi bul tizimge Boryshkerlerdiń biryńǵai tizilimindegi adamdar (qaryzdaryn tólemegender) da qosylady.
- - Memlekettik qyzmetshilerge, áskeri qyzmetshilerge, arnaiy jáne quqyq qorǵaý organdarynyń qyzmetkerlerine, biýdjettik uiymdardyń basshylaryna qumar oiyndar oinaýǵa tyiym salynady. Tyiymdy buzǵany úshin olardy jumystan shyǵarý sharasy qoldanylady.
2. Oiyn biznesin retteý:
- - Oiyn biznesin uiymdastyrýshylardyń qyzmetin retteý kúsheitildi. Týrizm jáne sport ministrligi oiyn mekemeleriniń, býkmekerlik keńselerdiń, totalizatorlardyń, stavkalardy qabyldaý jáne qumar oiyndardyń biryńǵai erejelerin bekitedi.
3. Jarnamaǵa shekteý:
- - Býkmekerlik keńseler men totalizatorlardyń jarnamasyna qatań shekteýler qoiyldy. Syrtqy jarnama, kólik quraldaryndaǵy, buqaralyq aqparat quraldaryndaǵy, kino jáne video oryndaryndaǵy jarnamalarǵa tyiym salynady. Tek sport ǵimarattarynyń ishinde, sportshylardyń kiiminde, sporttyq taqyryptaǵy BAQ-ta jáne otandyq telearnalardaǵy halyqaralyq sporttyq jarystardy tikelei transliatsiia kezinde jarnama jasaýǵa ruqsat etiledi.
4. Lotereia qyzmetin retteý:
- - Lotereia biletterin taratýǵa jáne lotereia terminaldaryn turǵyn úilerde, jataqhanalarda, ǵibadat úilerinde, mádeniet uiymdarynyń ǵimarattary men qurylystarynda, áleýmettik obektilerde (bilim berý, densaýlyq saqtaý), sondai-aq olardan júz metr qashyqtyqtaǵy radiýsta ornatýǵa tyiym salynady.
5. Energetikalyq sýsyndarǵa shekteý:
- - Óskeleń urpaqtyń densaýlyǵyn qorǵaý maqsatynda, energetikalyq sýsyndardy 21 jasqa deiingi adamdarǵa satýǵa tyiym salynady.
Zańnyń tolyq mátini baspasózde jariialanady.
