Qazaqstan kásiporyndaryn eń ozyq qoljetimdi tehnologiiaǵa kóshirý jumystary energetika salasynan bastalady.
Bul týraly QR Parlamenti Senatynyń depýtaty Baqytjan Jumaǵulov aityp berdi, dep habarlaidy QazAqparat.
«Búgin biz ekologiianyń jáne jasyl ekonomikanyń eń ózekti máselelerin talqylaýǵa jinaldyq. Taza ekologiia men ekonomika qurý – aitarlyqtai kúrdeli mindet. Bir jaǵynan, óndiristik sektorlar halyqty qajetti taýarlarmen qamtamasyz etedi. Ekinshi jaǵynan dál osy sektorlar qorshaǵan ortany lastaidy. Bul jaǵdaidan qalai shyǵamyz? Prezident biylǵy Qazaqstan halqyna Joldaýynda elimizdiń jasyl damýyna erekshe nazar aýdardy. Birinshiden, bul ult densaýlyǵyna, halyqtyń jáne qoǵamnyń ál-aýqatyna tikelei qatysty. Atalǵan mindetterge qol jetkizý úshin QR Ekologiia, geologiia jáne tabiǵi resýrstar ministrligi úlken jumys atqarýda. Jańa Ekologiialyq kodekstegi birinshi kezektegi mindet – qazaqstandyq kásiporyndardy eń ozyq qoljetimdi tehnologiialarǵa (EQT) – tehnikanyń eń úzdik jetistikteri qaǵidattaryna aýystyrý bolyp otyr», - dep atap ótti B. Jumaǵulov.
Eń ozyq qoljetimdi tehnologiialar (EQT) — sharýashylyq qyzmettiń qorshaǵan ortaǵa teris áserin azaitýǵa baǵyttalǵan, uiymdastyrý jáne basqarý sharalaryn qamtamasyz etetin salalyq tehnologiialar, tehnika jáne jabdyq. Iaǵni, OQT naqty bir ónerkásip salasynyń erekshelikterin eskere otyryp, qorshaǵan ortaǵa teris áserin azaitýdyń anaǵurlym sapaly jáne ekonomikalyq negizdelgen baqylaý elementi bolýy tiis.
Baqytjan Jumaǵulovtyń aitýynsha, OQT paidalaný – eldiń jasyl damýynyń, ekologiia múddesinde sai tepe-teńdikti qamtamasyz etýdiń úzdik álemdik tájiribesi. Bul tehnologiia EYDU-nyń 39 elinde jáne Belarýs, Qytai jáne Resei elderinde qoldanylady. Onyń maqsaty – ekologiialyq taza jáne biznes úshin qoljetimdi tehnologiialardy qaita óńdeý. Iaǵni, qorshaǵan ortaǵa teris áserdi barynsha azaitý.
«Qazir Halyqaralyq jasyl tehnologiialar jáne investitsiialyq jobalar ortalyǵy ǵylymi-tehnikalyq keńes múshelerimen birlesip, energetika, taý-ken metallýrgiia, himiia salalarynyń 50 iri kásiporny úshin túsindirý, keshendi tehnologiialyq baǵalaý jumystaryn júrgizýde. Elimizdiń energetikalyq sektory – lastaityn zattar shyǵarýdyń eń iri kózi ekenin eskerýimiz kerek. Onyń úlesinde Qazaqstan boiynsha shyǵaryndylardyń shamamen 40% bar. Osy faktorlardyń barlyǵy bizdi energetika salasynan bastap eń ozyq qoljetimdi tehnologiialarǵa kóshýge baǵyttap otyr. Birinshiden, OQT-ǵa kóshýdi 14 elektr stantsiiasynan bastaimyz, olarǵa ziiandy zattardyń jalpy el shyǵaryndylarynyń shamamen 30% tiesili», - dedi depýtat.
Sonymen birge, B. Jumaǵulov eń ozyq qoljetimdi tehnologiialar qaǵidatyna kóshýdiń jan-jaqty taldaý men zertteýdi talap etetin, uzaq eńbekti qajet etetin protsess ekenin basa aitty.
«Jańa ózgerister udaiy zertteý men talqylaýdy qajet etedi. Sondyqtan búgingi alańda elimizdiń jasyl damýy úshin eń ozyq qoljetimdi tehnologiialar qaǵidatyna kóshýdiń tiimdi, qajetti sheshimderin talqylaý úshin, ázirleý úshin jinaldyq. Búgingi konferentsiia osy salada tájiribe men bilim almasý úshin kásibi jáne syndarly dialog qurýǵa múmkindik beretinine senimdimin», - dedi Baqytjan Jumaǵulov.
Aita keteiik, Halyqaralyq jasyl tehnologiialar ortalyǵynda «Jasyl» ekonomika jáne eń ozyq qoljetimdi tehnologiialar qaǵidattaryna kóshý máseleleri» atty II halyqaralyq konferentsiia ótip jatyr.
Konferentsiianyń basty spikerleri retinde qazaqstandyq sarapshylar jáne Lastanýdyń aldyn alý jáne baqylaý jónindegi Eýropalyq keshendi biýronyń basshysy Serj Roýdie, BUU ESKATO Qorshaǵan orta jáne damý departamentiniń direktory Stefanes Fotiý, Qorshaǵan orta jónindegi nemis agenttiginiń ónerkásiptik shyǵaryndylar direktivasy jónindegi ýákiletti ulttyq organnyń sarapshysy Katia Kraýs siiaqty taiaý jáne alys shetelden kelgen sarapshylar qatysady.
