Qazaqstanda jańa kásibi mereke bekitildi, - dep habarlaidy "Ult aqparat" Úkimet basshysynyń baspasóz qyzmetine silteme jasap.
10 qarashada Tsifrlandyrý jáne aqparattyq tehnologiialar qyzmetkerleri kúni atalyp ótiledi. Premer-Ministr Álihan Smaiylov «Qazaqstan Respýblikasyndaǵy merekelik kúnderdiń tizbesin bekitý týraly» Qazaqstan Respýblikasy Úkimetiniń 2017 jylǵy 31 qazandaǵy № 689 qaýlysyna ózgerister men tolyqtyrý engizý týraly» tiisti qaýlyǵa qol qoidy.
Osyǵan bailanysty 17 mamyrda atalyp ótiletin Bailanys jáne aqparattandyrý qyzmetkerleri kúni merekesi Bailanys qyzmetkerleri kúni bolyp ózgertildi.
Jańa kásibi merekeni bekitýge sala qyzmetkerlerin qoldaý maqsatynda Tsifrlyq damý, innovatsiialar jáne aeroǵarysh ónerkásibi ministrligi bastamashy bolǵan. Búginde olardyń jalpy sany 155 myńnan astam adamdy quraidy.
Aita keteiik, tsifrlyq transformatsiia – qoǵamnyń ómir súrý sapasyn jaqsartatyn, eńbek ónimdiliginiń ósýin qamtamasyz etetin, ekonomikanyń básekege qabilettiligin arttyratyn negizgi faktorlardyń biri. Aqparattyq tehnologiialar salasyndaǵy mamandar eńbek naryǵynda joǵary suranysqa ie.
Biyl Qazaqstan BUU elektrondyq úkimetti damytý jónindegi reitinginde (UN Global e-Government Development Index) 193 memlekettiń ishinde 28-oryndy ielendi. Atap aitqanda, «onlain-qyzmetter sapasynyń indeksi» boiynsha elimiz 8-orynda.
Qaýly alǵashqy resmi jariialanǵan kúninen bastap qoldanysqa engiziledi.
