Qazaqstanda jańa arnaiy salyq rejimi qoldanylatyn qyzmet túrleriniń tizbesi anyqtaldy. Bul týraly búgin Úkimet otyrysynda QR Premer-Ministri Asqar Mamin aitty, dep habarlaidy QazAqparat.
«Biznesti qoldaý úshin ótken jyly 700 myńnan asa zańdy tulǵalar men jeke kásipkerlerge aýqymdy salyqtyq yntalandyrý sharalary kórsetildi. Qazirgi kezde mikro jáne shaǵyn biznes sýbektilerin tekserýge 3 jyldyq moratorii jalǵasyp jatyr jáne arnaiy salyq rejimderin qoldanatyn shaǵyn jáne orta biznes sýbektileri tabys salyǵynan bosatyldy», - dedi ol.
Úkimet basshysynyń aitýynsha, bul sharalar kásipkerlerdiń 3 jylda shamamen 400 mlrd teńgeni óz biznesin keńeitý men damytýǵa jumsaýyna múmkindik beredi.
«Buǵan qosa, Memleket basshysy Qasym-Jomart Kemeluly Toqaevtyń tapsyrmasy boiynsha osy jylǵy 1 qańtardan bastap erikti túrde qoldanylatyn, jańa arnaiy salyq rejimi – bólshek salyq engizildi. Salyq mólsherlemesi tabystyń 3 paiyzy mólsherinde belgilendi. Úkimet bul rejim qoldanylatyn qyzmet túrleriniń tizbesin anyqtady. Tizbege pandemiia kezinde karantindik shekteý sharalary qoldanylǵan qyzmetter engizildi», - dedi Asqar Mamin.
Premer-Ministr atalǵan rejim shaǵyn jáne orta biznes sýbektileriniń salyq júktemesin azaitý jáne salyqtar men tólemderdi biýdjetke tóleý tártibin ońtailandyrý maqsatynda daǵdarysqa qarsy shara retinde 2 jylǵa eseptelgenin aitty.
«Sonymen qatar, jeke tulǵalardyń salyq mindettemelerin oryndaýyn jeńildetý úshin biyldan bastap múlik jáne jer salyqtary bir tólemge biriktirildi, kóppáterli úilerdiń ielerine jer salyǵy salynbaidy. Múddeli memlekettik organdarmen birge olardy iske asyrý boiynsha úilesimdi jumysty jalǵastyrý kerek», - dedi Úkimet basshysy.
