Foto: gov.kz
Qazaqstanda zańgerler, jýrnalister jáne belsendi azamattar Qylmystyq kodekstiń 274-babyn qylmystyq jaýapkershilikten alyp, ony ákimshilik quqyqbuzýshylyq sanatyna aýystyrýdy talap etýde, dep habarlaidy Ult.kz Dalanews.kz-ke silteme jasap.
Úndeýde bul bap qazirgi tańda sóz bostandyǵyn shekteitin, qoǵamdyq synǵa qysym jasaityn jáne jýrnalister men belsendilerge qylmystyq qýdalaý qaýpin tóndiretin quralǵa ainalǵany atalyp ótken.
"Qazaqstan Respýblikasynyń Qylmystyq kodeksindegi 274-bap – ádeii jalǵan aqparat taratqany úshin jazalaý kózdelgen norma – is júzinde sóz erkindigin shektep, qoǵamdyq synǵa tosqaýyl bolyp otyr. Baptyń bastapqy maqsaty – dezinformatsiiamen kúresý bolǵanymen, tájiribede ol áleýmettik jelidegi pikirler men buqaralyq aqparat quraldaryndaǵy syni materialdar úshin qýdalaýǵa jii qoldanylady. Bostandyqtan aiyrýǵa deiingi aýyr jaza bul quqyqbuzýshylyqtyń sipatyna múldem sai kelmeidi jáne ádildik pen sorazmerlik qaǵidattaryn buzady", – delingen úndeýde.
274-bapty dekriminalizatsiialaý týraly bul ótinish e-Otinish portaly arqyly resmi tirkelip, Bas prokýratýraǵa, Konstitýtsiialyq sotqa, Senat pen Májiliske joldanǵan. Sonymen qatar onlain-petitsiia da ázirlenip jatyr.
"Biz 274-bap boiynsha belsendiler men jýrnalisterge qatysty qozǵalǵan negizsiz qylmystyq isterdi dereý toqtatýdy talap etemiz. Bapty qylmystyq kodeksten shyǵaryp, ákimshilik jaýapkershilikke aýystyrý boiynsha zańnamaǵa tezdetip túzetýler engizý qajet. Bizdiń talaptarymyz: jaýapkershilikti Ákimshilik quqyqbuzýshylyq týraly kodekske kóshirý; aiyppul túrindegi ákimshilik jaza belgileý; bostandyqtan aiyrý múmkindigin tolyq joiý", – delingen úndeýde.
Qazaqstandyq jáne halyqaralyq quqyq qorǵaý uiymdary da uzaq jyldar boiy «jalǵan aqparat» úshin qylmystyq jaýapkershilikti synǵa alyp keledi.
