Tanymal ánshi Erke Esmahan Frantsiia astanasy Parijge baryp, álemge áigili óner juldyzy Selin Dionnyń kontsertin tamashalaǵanyn aitty, dep habarlaidy ult.kz.
Óner iesi áleýmettik jelidegi paraqshasynda kontsertten túsirilgen beinejazbany jariialap, erekshe áserimen bólisti. Ánshiniń aitýynsha, Selin Diondy sahnadan óz kózimen kórip, jandy daýysta án salǵanyn tyńdaý onyń kópten bergi armany bolǵan.
"Paris. 2026. Plenitude Arena. Celine Dion. Eýropadaǵy eń mańyzdy, tipti tarihi oqiǵa! Selindi kózben kórip, tiridei tyńdaǵanyma qýanyshtymyn! Osy jerde bolǵanyma baqyttymyn! Shúkir!" – dep jazdy Erke Esmahan.
Ánshi jariialaǵan videoda Selin Dionnyń áigili My Heart Will Go On ánin oryndaǵan sáti kórsetilgen.
Aita keteiik, bul týyndy 1997 jyly jaryq kórgen "Titanik" filminiń saýndtregi retinde keńinen tanylyp, álemdik mýzyka tarihyndaǵy eń tanymal ánderdiń birine ainaldy.
Erke Esmahan úshin Parijdegi kontsert súiikti ánshisiniń ónerin jaqynnan tamashalap, kópten kútken tilegin júzege asyrǵan erekshe sát bolǵan.
Erke Esmahan kim?
Erke Esmahan – qazaqstandyq estrada ánshisi, aktrisa jáne qazaq tilindegi tanymal ánderdiń oryndaýshysy. Ol 1984 jyly 30 qarashada Aqtóbe oblysynyń Yrǵyz aýylynda dúniege kelgen. Bolashaq ánshi bala kezinen mýzykaǵa qyzyǵyp, ónerge jaqyn bolyp ósti. Alǵashqy bilimin Yrǵyzdaǵy Ybyrai Altynsarin atyndaǵy mektepte alyp, keiin Aqtóbedegi mýzykalyq mektepte oqýyn jalǵastyrdy. Ol dombyra, qobyz jáne fortepiano aspaptarynda oinaýdy meńgergen. Mektepten keiin Ahmet Jubanov atyndaǵy mýzykalyq kolledjdiń opera bóliminde bilim aldy. Keiin Almatydaǵy Temirbek Júrgenov atyndaǵy Qazaq ulttyq óner akademiiasynda estradalyq vokal mamandyǵyn igerdi. Erke Esmahan kásibi shyǵarmashylyq jolyn Baian Maqsatqyzynyń prodiýserlik ortalyǵyna qarasty "Ińkár" tobynda bastady. Top quramynda óner kórsetkennen keiin jeke ánshilik mansabyna den qoidy.
Onyń alǵashqy jeke shyǵarmashylyq tabystarynyń biri "Aisha bibi" ánimen bailanysty. Bul týyndynyń sózin aqyn Fariza Ońǵarsynova jazǵan, al ánin kompozitor Bolat Qohamanov shyǵarǵan. Keiin Tóreǵali Tóreálimen birge oryndaǵan "Allo" áni keńinen tanylyp, tyńdarmandar arasynda úlken suranysqa ie boldy. Ásirese 2017 jyly jaryq kórgen "Qaida?" áni Erke Esmahannyń tanymaldyǵyn arttyrdy. Atalǵan ánniń beinebaiany YouTube jelisinde milliondaǵan qaralym jinady. Ánshiniń repertýarynda "Asyl arman", "Bal sezim", "Erkemin", "Áiel baqyty" jáne "Júregim" sekildi shyǵarmalar bar.
Erke Esmahan ánshilikpen qatar kino salasynda da ózin synap kórdi. Ol 2018 jyly "Mahabbat kafesi" filminde basty rólderdiń birin somdady. Óner iesi shyǵarmashylyǵynda lirikalyq ánderge, mahabbat pen adam sezimderin jetkizetin týyndylarǵa erekshe oryn beredi. Búginde Erke Esmahan qazaq estradasynyń keńinen tanylǵan oryndaýshylarynyń biri sanalady.
