Foto: ashyq derekkóz
Qazaqstanda birjolǵy zeinetaqy tólemderine (BZT) satyp alynǵan turǵyn úilerdi satýǵa ýaqytsha shekteý engizý máselesi qarastyrylyp jatyr. Bul bastama Qarjy monitoringi agenttigi anyqtaǵan kúmándi shemalardan keiin kóterilgen, dep habarlaidy Ult.kz Tengrinews.kz portalyna silteme jasap.
Agenttiktiń málimetinshe, kei azamattar zeinetaqy jinaǵyn merziminen buryn sheship alý úshin jyljymaityn múlik satyp alý syltaýyn paidalanyp, keiin sol páterdi birneshe ret qaita satýmen ainalysqan.
«Otbasy bank» ókilderi redaktsiianyń resmi saýalyna jaýap bere otyryp, mundai jaǵdailar zańdy tikelei buzý bolyp sanalmaitynyn, alaida bul zeinetaqy qarajatynyń maqsatsyz jumsalýyna jáne turǵyn úi baǵasynyń jasandy ósýine sebep bolatynyn atap ótti.
«Qoldanystaǵy erejelerde bul máselege qatysty naqty shekteý joq. Alaida mundai áreketter turǵyn úi naryǵynyń shynaiy statistikasyn burmalaidy jáne baǵanyń negizsiz qymbattaýyna ákeledi», – delingen banktiń túsindirmesinde.
Ziiandy tájiribelerdiń aldyn alý úshin «Otbasy bank» Indýstriia jáne qurylys ministrligine tiisti usynys joldaǵan. Basty usynys – zeinetaqy jinaǵymen satyp alynǵan páterdi 5 jyl ishinde satýǵa tyiym salý.
«Iaǵni azamat zeinetaqy qarajatyn paidalanyp baspana alsa, ol páterdi bes jyl boiy sata almaidy. Bul spekýliatsiialyq mámilelerdiń aldyn alyp, qarajattyń maqsatty jumsalýyn qamtamasyz etedi», – dep málimdedi bank ókilderi.
Degenmen, ázirge bul másele tek qaralý kezeńinde, naqty sheshim qabyldanǵan joq. Qoldanystaǵy zańnamada zeinetaqy tólemimen alynǵan jyljymaityn múlikke shekteý qoiý tikelei qarastyrylmaǵan.
«Búginde zeinetaqy jinaǵyn merziminen buryn sheship alýǵa tolyq tyiym salý máselesi kún tártibinde joq», – dedi banktiń baspasóz qyzmeti.
Aita keteiik, 15 qyrkúiekten bastap Qazaqstanda stomatologiialyq qyzmetterge zeinetaqy jinaǵyn paidalaný ýaqytsha toqtatylǵan. Bul sheshim tiisti ótinishterdi rásimdeý kezinde júieli zańbuzýshylyqtar anyqtalǵan soń qabyldanǵan.
