فوتو: اشىق دەرەككٶز
قازاقستاندا بٸرجولعى زەينەتاقى تٶلەمدەرٸنە (بزت) ساتىپ الىنعان تۇرعىن ٷيلەردٸ ساتۋعا ۋاقىتشا شەكتەۋ ەنگٸزۋ مەسەلەسٸ قاراستىرىلىپ جاتىر. بۇل باستاما قارجى مونيتورينگٸ اگەنتتٸگٸ انىقتاعان كٷمەندٸ سحەمالاردان كەيٸن كٶتەرٸلگەن, دەپ حابارلايدى Ult.kz Tengrinews.kz پورتالىنا سٸلتەمە جاساپ.
اگەنتتٸكتٸڭ مەلٸمەتٸنشە, كەي ازاماتتار زەينەتاقى جيناعىن مەرزٸمٸنەن بۇرىن شەشٸپ الۋ ٷشٸن جىلجىمايتىن مٷلٸك ساتىپ الۋ سىلتاۋىن پايدالانىپ, كەيٸن سول پەتەردٸ بٸرنەشە رەت قايتا ساتۋمەن اينالىسقان.
«وتباسى بانك» ٶكٸلدەرٸ رەداكتسييانىڭ رەسمي ساۋالىنا جاۋاپ بەرە وتىرىپ, مۇنداي جاعدايلار زاڭدى تٸكەلەي بۇزۋ بولىپ سانالمايتىنىن, الايدا بۇل زەينەتاقى قاراجاتىنىڭ ماقساتسىز جۇمسالۋىنا جەنە تۇرعىن ٷي باعاسىنىڭ جاساندى ٶسۋٸنە سەبەپ بولاتىنىن اتاپ ٶتتٸ.
«قولدانىستاعى ەرەجەلەردە بۇل مەسەلەگە قاتىستى ناقتى شەكتەۋ جوق. الايدا مۇنداي ەرەكەتتەر تۇرعىن ٷي نارىعىنىڭ شىنايى ستاتيستيكاسىن بۇرمالايدى جەنە باعانىڭ نەگٸزسٸز قىمباتتاۋىنا ەكەلەدٸ», – دەلٸنگەن بانكتٸڭ تٷسٸندٸرمەسٸندە.
زيياندى تەجٸريبەلەردٸڭ الدىن الۋ ٷشٸن «وتباسى بانك» يندۋسترييا جەنە قۇرىلىس مينيسترلٸگٸنە تيٸستٸ ۇسىنىس جولداعان. باستى ۇسىنىس – زەينەتاقى جيناعىمەن ساتىپ الىنعان پەتەردٸ 5 جىل ٸشٸندە ساتۋعا تىيىم سالۋ.
«ياعني ازامات زەينەتاقى قاراجاتىن پايدالانىپ باسپانا السا, ول پەتەردٸ بەس جىل بويى ساتا المايدى. بۇل سپەكۋلياتسييالىق مەمٸلەلەردٸڭ الدىن الىپ, قاراجاتتىڭ ماقساتتى جۇمسالۋىن قامتاماسىز ەتەدٸ», – دەپ مەلٸمدەدٸ بانك ٶكٸلدەرٸ.
دەگەنمەن, ەزٸرگە بۇل مەسەلە تەك قارالۋ كەزەڭٸندە, ناقتى شەشٸم قابىلدانعان جوق. قولدانىستاعى زاڭنامادا زەينەتاقى تٶلەمٸمەن الىنعان جىلجىمايتىن مٷلٸككە شەكتەۋ قويۋ تٸكەلەي قاراستىرىلماعان.
«بٷگٸندە زەينەتاقى جيناعىن مەرزٸمٸنەن بۇرىن شەشٸپ الۋعا تولىق تىيىم سالۋ مەسەلەسٸ كٷن تەرتٸبٸندە جوق», – دەدٸ بانكتٸڭ باسپاسٶز قىزمەتٸ.
ايتا كەتەيٸك, 15 قىركٷيەكتەن باستاپ قازاقستاندا ستوماتولوگييالىق قىزمەتتەرگە زەينەتاقى جيناعىن پايدالانۋ ۋاقىتشا توقتاتىلعان. بۇل شەشٸم تيٸستٸ ٶتٸنٸشتەردٸ رەسٸمدەۋ كەزٸندە جٷيەلٸ زاڭبۇزۋشىلىقتار انىقتالعان سوڭ قابىلدانعان.
