Qazaqstanda koronavirýsqa qarsy vaktsinanyń eki dozasyn alǵandar millionnan asty. 28 mamyr kúngi málimet boiynsha, elde 1 mln 21 myń 100 adamǵa (halyqtyń 5,3 paiyzy) vaktsinanyń eki dozasy salynǵan. Ministrliktiń málimetinshe, vaktsinanyń alǵashqy komponentin 2 mln 76 myń adam (halyqtyń 10,8 paiyzy) alǵan.
Ótken táýlikte shamamen 20 myń adamǵa vaktsina egilgen. Beisenbi kúni bul kórsetkish boiynsha Túrkistan oblysy (3,3 myń), Almaty qalasy (2,2 myń adam), Almaty oblysy (1,9 myń adam) men Shyǵys Qazaqstan oblysy (1,9 myń adam) alǵa shyqqan. Jalpy vaktsinalaý qarqyny tómendegidei:
- Almaty qalasynda – 302,4 myń adam (15,3 paiyz) vaktsinanyń alǵashqy dozasyn alǵan;
- Shymkent – 172,9 myń (15,8%);
- Almaty oblysy – 216,5 myń adam (10,4%);
- Túrkistan oblysy – 194,7 myń adam (9,5%);
- Qaraǵandy oblysy – 158,5 myń (11,4%);
- Nur-Sultan – 158,4 myń (13,2%);
- Shyǵys Qazaqstan oblysy – 136,4 myń (10,1%);
- Jambyl oblysy – 105,5 myń (9,2%);
- Qyzylorda oblysy – 83,8 myń (10,1%);
- Qostanai oblysy – 83,7 myń (9,6%);
- Pavlodar oblysy – 80,6 myń (10,5%);
- Aqtóbe oblysy – 79,6 myń (9%);
- Aqmola oblysy– 72,8 myń adam (9,8%);
- Soltústik Qazaqstan oblysy – 71,4 myń (13,2%);
- Batys Qazaqstan oblysy – 67,3 myń (10%);
- Atyraý oblysy – 53,2 myń (7,9%);
- Mańǵystaý oblysy – 39,1 myń (5,4%).
Úkimet buǵan deiin mamyr aiynda eki million adamdy vaktsinadan ótkizemiz dep málimdegen edi. Jergilikti aqparat agenttikteriniń habarlaýynsha, úkimet sáýir aiynda da solai dep málimdegen.
Shamamen 19 mln turǵyny bar Qazaqstanda koronavirýsqa qarsy ekpe salý naýqany aqpan aiynda bastalǵan. Birinshi kezekte meditsina qyzmetkerleri, muǵalimder, kúshtik qurylym qyzmetkerlerine salyndy. 1 sáýirde ózge kategoriiadaǵy azamattarǵa salyna bastady.
Elde reseilik "Spýtnik V" vaktsinasymen qatar qazaqstandyq QazVac jáne BAÁ-de óndirilgen qytailyq Sinopharm kompaniiasynyń vaktsinasy paidalanylyp jatyr.
