Qazaqstanǵa shetelden ákelinetin koronavirýsqa qarsy vaktsinalar tolyq baqylaý men zertteýden ótken jáne elimizde osy kúnge deiin vaktsinanyń saldarynan adam ólimi tirkelgen emes.
Bul týraly QR Densaýlyq saqtaý ministrligi Sanitarlyq-epidemiologiialyq baqylaý komitetiniń resmi ókili Erjan Baitanaev málim etti, dep habarlaidy QazAqparat.
«Bizdiń elde bar vaktsinalar tolyq baqylaýdan ótken. Iaǵni Qazaqstanǵa ákelinetin vaktsina aldymen shyǵarylǵan elde baqylaýdan ótip, resmi tirkeledi. Bizge ákelgen soń ony ulttyq saraptama ortalyǵy taǵy tekseredi. Sodan soń baryp qana tirkeidi. Bizdiń mamandar vaktsinany baqylap qana qoimai, ony zertteidi. Osy kúnge deiin vaktsinanyń saldarynan adamnyń qaitys bolý jaǵdaiy tirkelgen emes», - dedi Erjan Baitanaev «Habar» telearnasyna bergen suhbaty barysynda.
Onyń aitýynsha, qazaqstandyqtar kóbinese koronavirýsqa qarsy Spýtnik V vaktsinasyn alyp jatyr.
Sondai-aq, komitettiń resmi ókili jasóspirimderdiń ekpe alýyna qatysty pikir bildirdi.
«Bizde jasóspirimderge arnalǵan (12-17 jas) Pfizer vaktsinasy bar. Bul vaktsinany álem moiyndap otyr jáne úlken suranysqa ie. Ata-analar balalaryn indetten qorǵaý maqsatynda bul múmkindikti paidalanýy kerek. Ókinishke qarai, ózderi vaktsina almaityn jáne balasyna da alýǵa ruqsat bermeitin ata-analar bar. Árine, ata-ananyń nemese asyraýshynyń ruqsatynsyz balaǵa vaktsina salynbaidy. Biz eshkimdi májbúrlei almaimyz. Mundai jaǵdaida otbasynyń basqa músheleriniń ekpe alǵany jón», - deidi ol.
