Qazaqstanda bailanys sapasynyń minimaldy shegi retteledi. Bul týraly búgin Úkimet otyrysynda QR Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin aitty, dep habarlaidy QazAqparat.
«Bailanys salasy boiynsha ótken jyly 2 aýqymdy joba iske asyryldy. Osylaisha 5 330 aýyldy internetpen qamtamasyz etý jumysy aiaqtaldy. Biraq, tekserý júrgizdik. 510 aýylda internet jyldamdyǵyna qatysty másele qalyp otyr. Kelesi eki jyl bailanys sapasyn jaqsartý boiynsha jumys júrgizemiz. Iaǵni, 286 aýyldy 3G-4 G standarttaryna aýystyrý, 224 aýyldy spýtniktik transmissiiadan talshyqty bailanys jelisine aýystyrý, sany 250 adamnan kem 242 aýylǵa mobildi internet ótkizemiz. Jalpy alǵanda 750 aýylda internet sapasy edáýir ósedi. 2021 jyly operatorlar 752 bazalyq stansa salady. Oǵan qosa taǵy 560 stansany jańartady», - dedi ministr.
Sonymen qatar ol qalalalarda da bailanys salasynda problemalar bar ekendigin aita kele, ákimderden bazalyq stansalarda ornatý úshin operatorlarǵa ǵimarattarǵa ruqsat alýdy qamtamasyz etýge, antenalar ornalastyrý oryndaryn izdestirýge kómek kórsetýdi ótindi.
«Buryn bailanys sapasynyń minimaldy shegi rettelmegen edi. Biz arnaýly buiryq jobasyn ázirledik. Onda bailanys sapasy kórsetkishterin anyqtadyq. Mysaly, 4G bailanys standarty boiynsha keminde sekýndyna 5 MB qajet etiletindigi aiqyndaldy. Qujat kópshilik talqylaýdan ótti. Memlekettik organdarmen kelisip, eki aidyń ishinde buiryqty qabyldaityn bolamyz», - dedi Baǵdat Mýsin.
