Qazaqstanda ýtil alymy stavkasynyń qalai eseptelýi kerektigi jáne ol úshin ǵylymi zertteý júrgizýdiń mańyzdylyǵy aityldy, dep habarlaidy QazAqparat.
«Biz Úkimet pen ministrlikke qaita óńdeýshilerdiń aǵymdaǵy shyǵyndaryn negizge ala otyryp, ýtil alymdy qaita esepteýdi usyndyq. Sonymen qatar ekinshi rettik resýrstarmen ne isteitindigine qatysty másele tur. Ol degenimiz mys, aliýminii, bolat, qaldyq mai, dóńgelek, akkýmýliator jáne taǵys basqa. Kóp jaǵdaida olardy naryqqa ekinshi rettik materialdyq resýrstar túrinde satyp jatady. Sondyqtan biz ǵylymi-zertteý jumystaryn júrgizýdi jáne qaita óńdeýshilerdiń resýrstardy satýdan qandai kiris alatyndyǵyn jáne olar qandai shyǵyndar ákeletinin naqtylaýymyz qajet. Bul teńgerimdi qaita qarap, biznes úshin 30-40% rentabeldilikpen jaǵdai jasaǵan jón», - dedi KazWaste qaldyqtardy basqarý Qazaqstan assotsiatsiiasynyń basqarma tóraǵasy Shynbolat Baiqulov elordada ótip jatqan ekologiia taqyrybyna arnalǵan konferentsiia barysynda.
Onyń aitýynsha, ýtil alymdy resýrstardyń kádege jaramdylyǵyna qarai belgilegen durys.
«Biz qazir ǵylymi-zertteý jumystaryn júrgizý qajettiligin alǵa tartyp otyrmyz. Bul naryqta kim jumys isteitindigin, shyǵyndar men qaita óńdeýdiń naqty úlesin anyqtaý úshin qajet. Jáne atalǵan sharany «Jasyl damý» memlekettik operatory jasaýy tiis dep esepteimiz. Mysaly, jeńil avtomobildiń keibir qaldyqtaryn qaita óńdeý múmkin emes. Ol degenimiz poliýretandy qaptama, polivinilhlorid, onyń ishinen avtomobildiń belgili bir bólikteri nemese túiinderi turady. Olardy alyp tastaý ekonomikalyq turǵydan tiimsiz. Sondyqtan olardy ainalymǵa qaitarý, qaýipsiz túrde alyp tastaý nemese sýbsidiialaý kerek», - deidi ol.
