QR Indýstriia jáne infraqurylymdyq damý ministri Beibit Atamqulovtyń jáne Azamattyq aviatsiia komiteti, «Azamattyq aviatsiia akademiiasy» AQ jáne «Qazaqstannyń aviatsiialyq ákimshiligi» basshylarynyń qatysýymen beinekonferentsiia bailanysy rejiminde azamattyq aviatsiia mamandaryn daiarlaý sapasy máseleleri boiynsha jumys keńesi ótti.
Bul týraly atalǵan vedomstvonyń baspasóz qyzmeti habarlady.
Ministr Akademiiada kadrlar daiarlaýdyń jetkiliksiz deńgeiin atap ótti. Birinshi kezekte bul ushý quramyn oqytý baǵdarlamasynyń halyqaralyq standarttarǵa sáikes kelmeýine, sondai-aq otandyq aviakompaniialar tarapynan salalyq oqý orny túlekteriniń tómen suranysqa ie bolýyna bailanysty.
Máseleni sheshý úshin vedomstvo basshysy talapkerlerdi irikteýdi kúsheitýdi jáne Akademiiaǵa túsý úshin ótý baldaryn arttyrýdy, sondai-aq aviatsiianyń basqa túrleri úshin personaldy daiarlaý baǵdarlamasyn engizýdi tapsyrdy. Kóptegen jyldar boiy Boing korporatsiiasynyń bas piloty bolǵan «Qazaqstannyń aviatsiialyq ákimshiligi» Ushý qaýipsizdigi departamentiniń basshysy Linda Orledi de birqatar mańyzdy eskertýlerdi aityp ótti. Sonymen, júrgizilgen inspektorlyq tekserý qorytyndysy boiynsha Akademiianyń birqatar sáikessizdikteri atap ótildi, olar JOO-nyń QR Bilim jáne ǵylym ministrliginen beiindi ministrlikke berilýin esepke ala otyryp, jas aviatorlardy oqytý tásilderin júieli ózgertýdi talap etedi.
Óz kezeginde, buǵan deiin alǵa qoiylǵan mindetterdi tabysty júzege asyrý jáne aldyńǵy qatarly álemdik joǵary oqý oryndarynyń qataryna shyǵý úshin Azamattyq aviatsiia akademiiasy 2025 jylǵa deiingi Akademiiany damytý Baǵdarlamasyn bekitken bolatyn. Talqylaý qorytyndysy boiynsha ol halyqaralyq sarapshylardyń usynystaryn eskere otyryp, jaqyn arada qaita qaralatyn bolady.
