9 naýryzdaǵy derek boiynsha, qazir Qazaqstanda koronavirýs taraǵan elderden kelgen 3676 adam karantinde. Bul týraly Qazaqstan densaýlyq saqtaý ministrligi habarlady.
Qytai, Ońtústik Koreia ia Irannan kelgen 1053 adam, Italiiadan kelgen 182 adam, Germaniia men Ispaniiadan kelgen 2849 adam meditsinalyq baqylaýda. 408 adam karantinnen shyqqan.
Ministrliktiń dereginshe, baqylaýdaǵy adamdardyń analizderi Almatydaǵy Aiqymbaev atyndaǵy karantindik jáne zoonozdy juqpalylar qazaq ǵylymi ortalyǵyna jiberilgen.
Úkimettiń málimdeýinshe, Qazaqstanda koronavirýs juqtyrǵandar joq. Qazaqstan úkimetiniń sheshimimen virýs kóp taraǵan elderden kelgender 14 kún karantinge jiberiledi.
Qytaida taraǵan Covid-19 virýsyn álemde juqtyrǵandar sany 110 myńǵa jýyqtap qaldy. 3800-dei adam qaza boldy.
Virýs taraǵan Qytaida 8 naýryzda 41 adam dertke shaldyqqany belgili boldy. Bul elde kúnnen-kúnge virýs juqtyrǵandar sany azaiyp keledi. Degenmen, Qytaida qańtardyń basynan beri 80 myń adam virýs juqtyryp, úsh myńnan astam adam opat boldy.
Al Ońtústik Koreiada virýs juqtyrǵandar 7400-ge jýyqtady. Elý adam qaza boldy.
Iranda virýs juqtyrǵandar jeti myńǵa adamǵa jetti. 9 naýryzda virýstan baqilyq bolǵandar 230-dan asty.
8 naýryzdaǵy derek boiynsha, Italiiada qazir 7375 adam dertke shaldyǵyp, 366 adam ómirden ótti. Italiia virýs kóp taraǵan soltústik aimaqty, 16 milliondai halyqty, 3 sáýirge deiin karantinge japty.
