Foto: Gov.kz
Qazaqstan Respýblikasynyń Mádeniet jáne aqparat ministri Aida Balaeva Italiia Mádeniet ministrliginiń Restavratsiia jónindegi ortalyq institýtynyń direktory Lýidji Olivamen kezdesti, dep habarlaidy Ult.kz.
Taraptar Qazaqstan Respýblikasynyń Ulttyq mýzeii men Italiia Respýblikasynyń Restavratsiia jónindegi ortalyq institýty arasynda Memorandýmǵa qol qoidy.
Qujatqa sáikes, QR Ulttyq mýzei janynan Restavratsiia ortalyǵy qurylady. Jańa mekeme tájiribe almasý, birlesken seminarlar ótkizý jáne bilikti mamandar daiarlaý ortalyǵy bolmaq.
«Bul baǵyttaǵy institýtsionaldyq negiz qurý – strategiialyq másele. Qazaqstan men Italiia arasyndaǵy qarym-qatynas qarqyndy damyp keledi. Eki el basshylarynyń kezdesýleri, ózara qoldaýy jáne barlyq baǵyttarda – ekonomikalyq, syrtqy saiasi, mádeni-gýmanitarlyq yntymaqtastyqty nyǵaitýy sonyń dáleli. Osyndai mádeni bailanystar bizdiń halyqtardyń birin-biri tereńirek tanýyna yqpal etedi», – dedi Aida Balaeva.
Ministrdiń aitýynsha, italiialyq mamandardyń tájiribesi mýzei isin, restavratsiia qyzmetin jáne ulttyq murany saqtaý isin damytýǵa sep bolady.
«Restavratsiia ortalyǵynyń jemisti jumys isteýi – joǵary deńgeidegi mamandardyń eńbegine bailanysty. Biz metall, tas, mata, aǵash jáne basqa da materialdardan jasalǵan kórkem jáne tarihi-mádeni qundylyqtardy qalpyna keltirýmen ainalysatyn kásibi kadrlar tobyn daiarlaýǵa atsalysqymyz keledi. Bul óte mańyzdy, sebebi Ulttyq restavratsiia ortalyǵyn qurý arqyly biz jańa býyn mamandardy daiarlaityn aimaqtyq ortalyqtardy da qalyptastyramyz. Sondai-aq, osy jumystyń áleýmettik jáne qaiyrymdylyq tusyn da eskerý mańyzdy. Eger daiarlyq baǵdarlamasyna múmkindigi shekteýli jastardy tartyp, olarǵa restavrator mamandyǵyn igerýge jáne suranystaǵy kásibi maman retinde damýyna múmkindik bersek, óte jaqsy bolar edi dep esepteimin», – dedi ministr.
Lýidji Oliva óz tarapynan yntymaqtastyqqa daiyn ekenin bildirdi.
«Qazaqstanda Ulttyq restavratsiia ortalyǵyn qurý – bul tek mádeni joba emes, sonymen qatar jańa jumys oryndaryn ashýǵa múmkindik. Ortalyqtyń qyzmeti metall, aǵash, mata, tas jáne basqa da materialdardan jasalǵan buiymdardy qalpyna keltirý baǵyttaryn qamtidy. Biz qazaqstandyq restavratorlardy oqytýǵa jáne mýzei eksponattarymen jumys isteýdiń ozyq tehnologiialaryn engizýge daiynbyz», – dedi Italiia Mádeniet ministrliginiń Restavratsiia jónindegi ortalyq institýtynyń direktory Lýidji Oliva.
Kezdesý barysynda Aida Balaeva Astanada ótken Leonardo da Vinchidiń «Ádemi hanshaiym» kartinasynyń kórmesi týraly da atap ótti.
Bul kórme qazaqstandyq kórermenniń qyzyǵýshylyǵyn týdyrdy. Ministr italiialyq tarap osy baǵyttaǵy yntymaqtastyqty jalǵastyryp, Italiia sýretshileriniń basqa da týyndylarynyń kórmesin ótkizýge qoldaý bildirýge daiyn ekenin jetkizdi.
Kezdesý sońynda taraptar ózara yntymaqtastyq Qazaqstan men Italiia arasyndaǵy dostyqty nyǵaitýǵa mańyzdy úles qosatynyna senim bildirdi.
