Búgin respýblika boiynsha Ulttyq biryńǵai testileý bastaldy. 20 maýsym men 1 shilde aralyǵynda ótetin UBT-da 92 827 túlek synǵa túsedi, dep habarlaidy Ult.kz tilshisi QazAqparat agenttigine silteme jasap.
Ulttyq testileý ortalyǵynyń málimetinshe, biyl UBT-ǵa qatysýǵa 92 827 túlek niet bildirip, aryz jazǵan. Olar biylǵy mektep bitirýshilerdiń jalpy sanynyń (131 377) 71% qurap otyr. UBT tapsyrýǵa nietti 69 209 túlek qazaq tilinde, al 23 618 - orys tilinde tapsyrady. UBT 165 tapsyrý pýnktiniń 1431 aýditoriiasynda ótkiziledi. Bul aýditoriialar bailanys signaldaryn bógeitin qurylǵylarmen, metall detektorlarymen, UBT barysyn baqylaý jáne jazý beinekameralarymen, sondai-aq Internet arqyly onlain taratý kameralarymen jabdyqtalǵan.
«Ata-analarǵa yńǵaily jaǵdai qamtamasyz etý maqsatynda 108 pýnkttegi UBT barysy monitorǵa shyǵarylyp, kórsetiledi. Ádettegidei, UBT ótkizý oryndarynda meditsinalyq qyzmet pen quqyq qorǵaý organdarynyń ókilderi jumys istep, aýyz sý jáne taǵam ónimderin satý oryndary qyzmet kórsetedi», - deidi QR BǴM baspasóz qyzmeti.
