Qazaqstanda tótenshe jaǵdai rejimi kezinde túrmeden 300-ge tarta adam bosap shyqty, dep habarlaidy "Ult aqparat" QR IIM Qylmystyq-atqarý júiesi komitetine silteme jasap.
«Tótenshe jaǵdai rejimi kezinde sottalǵan 322 adam úiine oraldy. Onyń ishinde 282 adam qylmystyq-atqarý júiesi qyzmetkerleriniń ilesip júrýimen turǵylyqty jerine jetkizildi. Qalǵany týǵan-týystarymen ketse, keibiri áleýmettendirý ortalyqtary men qoǵamdyq pansionattarǵa ornalastyryldy», - dedi komitet tóraǵasynyń orynbasary Meiram Aiýbaev.
Sottalǵan, biraq túrmeden bosatylǵan adamdardy úiine deiin jetkizip tastaý týraly sheshim karantin kezindegi qozǵalystyń kúrdelenýine bailanysty jáne koronavirýs infektsiiasynyń taralýyn boldyrmaý maqsatynda qabyldanǵan.
«Sonymen qatar ony túrmeden tikelei jibere salsa, bóten qalada jumyssyz qalyp, qylmysqa qaita barýy múmkin edi. Aita keterligi, QR Ishki ister ministriniń buiryǵymen Qylmystyq-atqarý júiesi komiteti TJ ýaqytynda bostandyqqa shyqqan adamdardy jetkizip salý boiynsha arnaiy algoritm bekitken edi. Ol áli de kúshinde. Eń birinshi kezekte olardyń blokpostan ótý tártibi men óńirlerdegi jedel shtabtarmen birge alyp júrý baǵdarlary retke keltirildi. Bosatylǵandarǵa ilesip júrýge probatsiia qyzmetiniń mamandary tartyldy. Olar óz óńirindegi blokpostar sheginde ilesip júrdi. Jolda túrmeden shyqqan azamattar tamaqpen jáne qorǵanys quraldarymen qamtyldy», - delingen komitettiń habarlamasynda.
Máselen Shyǵys Qazaqstanda túrmeden shyqqan 187 adam probatsiia qyzmetiniń mamandarynyń kómegimen kedergisiz úiine oralǵan.
