«Salyq salý máseleleri boiynsha ekonomikany turaqtandyrý jónindegi odan arǵy sharalar týraly» QR Prezidentiniń 16 naýryzdaǵy Jarlyǵyn iske asyrý boiynsha odan arǵy sharalar týraly» QR Úkimetiniń 20 sáýirdegi qaýlysy arqyly kezekti salyqtyq yntalandyrýlar toptamasy kózdelýde, dep habarlaidy "Ult aqparat" QR Ulttyq ekonomika ministrliginiń baspasóz qyzmetine silteme jasap.
Birinshiden, Memleket basshysynyń 2020 jylǵy 31 naýryzdaǵy málimdemesinde aitylǵan tapsyrmalardy oryndaý úshin aǵymdaǵy jylǵy 1 sáýirden 1 qazanǵa deiin ekonomikanyń kóp zardap shekken salalaryndaǵy shaǵyn jáne orta biznes sýbektileri salyqtan jáne eńbekaqy tóleý qorynan alynatyn áleýmettik tólemderden (jeke tabys salyǵy, áleýmettik salyq, mindetti zeinetaqy jarnalary, mindetti meditsinalyq saqtandyrý jáne áleýmettik aýdarymdar) bosatyldy.
Saýda, qoǵamdyq tamaqtandyrý, qonaq úi nysandary, kólik jáne konsýltatsiialyq qyzmet kórsetý jáne IT salasyn qosqandaǵy qyzmet túrleriniń tolyq tizimi osy qaýlynyń 1 qosymshasyna sáikes, bekitilgen.
Budan basqa, 2 qosymshaǵa sáikes, aǵymdaǵy jylǵy 1 sáýirden 1 shildege deiin jekelegen iri kásipkerlik sýbektileri jeńildikterdi qoldaný úshin zardap shekken salalar boiynsha qyzmet túrleriniń tizbesi anyqtaldy.
Ekinshiden, áýe qatynasy salasynda infraqurylymdy qoldaý jáne jumys ornyn saqtaý maqsatynda ushýlar toqtatylǵan kezeńde yntalandyrý sharalary qabyldandy: barlyq áýejailar aǵymdaǵy jylǵy 1 sáýirden 1 qazanǵa deiin múlik salyǵynan bosatylyp, jyl sońyna deiin áýe kemelerine tehnikalyq qyzmet kórsetý jáne lizingtik mámilelerdi zańdyq súiemeldeý boiynsha beirezidentter úshin qosylǵan qun salyǵyn tóleý uzartyldy.
Úshinshiden, aǵymdaǵy jylǵy 1 qazanǵa deiin jeke praktikamen ainalysatyn tulǵalar (notariýstar, advokattar, sot oryndaýshylar, mediatorlar) múlik salyǵynan bosatyldy. Budan buryn, iri saýda nysandary, saýda oiyn-saýyq ortalyqtary, kinozaldar, teatrlar, kórmeler, sporttyq nysandar, sondai-aq qoǵamdyq tamaqtandyrý, qonaq úi, týristik qyzmet nysandary jyldyń sońyna deiin múlik salyǵynan bosatylǵan bolatyn.
Tórtinshiden, indetke qarsy is-sharalarǵa jumyldyrylǵan jumyskerler barlyq salyq túrlerinen jáne eńbekaqy tóleý qorynyń áleýmettik tólemderinen bosatyldy.
Besinshiden, salyq tóleýshilerge qolaily bolý úshin 2019 jylǵy salyqtyq mindettemeler esebi nysanyn tapsyrý merzimi 2020 jylǵy 31 naýryzdan 2020 jylǵy 31 mamyrǵa aýystyryldy.
