Qazaqstanda tórt donor óńir bar, qalǵan on úsh óńir sýbventsiialyq bolyp sanalady. Bul týraly Senattaǵy Úkimet saǵatynda QR Ulttyq ekonomika ministri Álibek Qýantyrov aitty, dep habarlaidy QazAqparat.
Búgin Senatta «Óńirlerdiń áleýmettik-ekonomikalyq damýyndaǵy teńgerimsizdikterdi azaitý maqsatynda biýdjetaralyq qatynastardy jetildirý» taqyryby talqylanyp jatyr.
«Memleket basshysy biýdjetaralyq qatynastardyń negizgi qaǵidattaryn saqtaýǵa, sondai-aq tutastai alǵanda óńirlerdiń qarjylyq derbestigin keńeitý qajettigine nazar aýdardy jáne biz sizdermen osy taqyrypty Parlament aiasynda jii talqylaimyz. Jalpy alǵanda, biýdjetaralyq qatynastar júiesi óńirlerdiń biýdjettik qamtamasyz etilý deńgeiin teńestirýge jáne eldiń Konstitýtsiiasy men zańdarynda kepildik berilgen memlekettik qyzmetter kórsetý úshin teń fiskaldyq múmkindikterdi qamtamasyz etýge baǵyttalǵan.
2008 jyldan bastap biýdjetaralyq qatynastar turaqty sipatqa ie jáne biýdjettik alymdar men sýbventsiialardyń kólemi jyl saiynǵy ózgeristersiz úsh jylǵa zańmen bekitiledi», - dedi Á. Qýantyrov
Onyń aitýynsha, úsh jyldyq kezeńge arnalǵan sýbventsiialar men alymdardy bekitý óńirler úshin yntalandyrýshy sipatqa ie jáne jergilikti mańyzy bar máselelerdi sheshý úshin ákimderge qosymsha kiristerdi óz betinshe qoldanýǵa múmkindik beredi.
«Jalpy, Biýdjet kodeksine sáikes jalpy sipattaǵy transfertterdiń kólemi jergilikti biýdjettiń kiristeri men shyǵyndarynyń kóleminiń boljamy arasyndaǵy aiyrmashylyq retinde aiqyndalady. Bizde tórt donor óńir bar. Bul Atyraý men Mańǵystaý oblystary jáne Almaty men Nur-Sultan qalalary. Qalǵan on úsh óńir sýbventsiialyq bolyp sanalady. 2022 jylǵa arnalǵan alymdardyń jalpy somasy 491 mlrd teńgeni quraidy, biýdjettik sýbventsiia kólemi 2 trln teńgeden astam. Júieniń máni – memlekettiń qaita bólý fýnktsiiasyn oryndaý, biýdjettik separatizmdi boldyrmaý», - dedi ministr.
