Foto: iStock
Jalǵan terrorizm – jai buzaqylyq emes, qoǵamdyq tártipke qol suǵatyn qaýipti qylmys. Árbir jalǵan qońyraý nemese habarlama beibit turǵyndar arasynda úrei týdyryp, mańyzdy kásiporyndardyń jumysynyń toqtaýyna sebep bolady. IIM osyndai “orynsyz qaljyń” úshin qandai jaza qarastyrylatynyn eske saldy, – dep habarlaidy Polisia.kz portaly.
"Biyl ishki ister organdary jalǵan terrorizm faktileri boiynsha 118 qylmystyq is tirkedi. 21 qylmystyq is boiynsha kúdiktiler anyqtalyp, ustaldy. 11 adamǵa qatysty úkim shyǵaryldy, olar túrli qylmystyq jazaǵa tartyldy", – dedi IIM ekstremizmge qarsy is-qimyl departamenti bastyǵynyń orynbasary Darhan Razýev.
Qazaqstanda terrorizm aktisi týraly kórineý jalǵan habarlaǵany úshin 5000 AEK-ke deiingi mólsherde aiyppul ne sol mólsherde túzeý jumystary, ia bolmasa 5 jylǵa deiingi merzimge bas bostandyǵyn shekteý nemese bas bostandyǵynan aiyrý jazasy kózdelgen (Qylmystyq kodekstiń 273-baby “Terrorizm aktisi týraly kórineý jalǵan habarlaý”).
"Mundai qylmys jasaǵan adamdar arasynda kámeletke tolmaǵandar sany artqanyn atap ótken jón. Máselen, ótken jyly terrorizm aktisi týraly kórineý jalǵan habarlar jasaǵany úshin 12 kámeletke tolmaǵan ustaldy, olardyń úsheýi bas bostandyǵyn shekteýge bailanysty naqty qylmystyq jazaǵa tartyldy. Biyl 11 jasóspirim ustaldy. Búgingi tańda tórt balaǵa qatysty is qylmystyq jaza jasyna jetpeýine bailanysty toqtatyldy. Olardyń ata-analary Ákimshilik quqyq buzýshylyq týraly kodekstiń 127-baby boiynsha “Kámeletke tolmaǵan adamdy tárbieleý jáne (nemese) oǵan bilim berý, onyń quqyqtary men múddelerin qorǵaý jónindegi mindetterdi oryndamaý” jaýapqa tartyldy, olarǵa aiyppul salyndy. Biraq qalǵan balalarǵa qatysty tergeý jalǵasýda", – dep atap ótti Darhan Razýev.
Spikerdiń aitýynsha, buǵan balalardyń internet-resýrstardy baqylaýsyz paidalanýy áser etti.
"Ártúrli destrýktivti toptarda balalar belgisiz adamdardyń yqpalyna túsip, ózderiniń jeke derekterin, telefon nómirlerin, elektrondyq jáshikterdiń mekenjailaryn berip qoiady. Al olar óz kezeginde balalardyń atynan kórineý jalǵan habarlamalardy jibere bastaidy. Mundai jaǵdailar boldy. Sondyqtan ata-analarǵa aitarym: balanyń internet jelisinde bolýyn qadaǵalap, qandai saittarǵa kiretinin jáne qandai resýrstarǵa qyzyǵýshylyq tanytatynyn baqylaýda ustaý qajet", – dedi ol.
Bul qylmys túri úshin qylmystyq jaýapkershilik 14 jastan bastalady. Sonymen qatar sot sheshimi negizinde shyǵyndar men osyndai habarlamadan keltirilgen barlyq zalal ótelýge jatady. Eger mundai áreketti kámeletke tolmaǵan bala jasaǵan jaǵdaida zalaldy óteý onyń ata-anasyna nemese zańdy ókilderine júkteledi.
"Kórineý jalǵan habarlamalar materialdyq shyǵyn ákelip qana qoimai, shuǵyl qyzmetterdiń ýaqytyn alady", – dedi politsiia polkovnigi.
Darhan Razýevtyń aitýynsha, quqyq qorǵaý organdarynda qylmystyń bul túrin ashýǵa barlyq múmkindikter bar.
"Bizde qajetti tehnikalyq quraldar, baǵdarlamalar bar. Sondai-aq sheteldik áriptestermen tyǵyz bailanystamyz. Mundai qylmystar jazasyz qalmaidy", – dep qorytyndylady ol.
