Áielderge arnalǵan baǵdarlamanyń talaptary ózgerdi. Endi «Umai» tabysy joǵary qyz-kelinshekterge de qoljetimdi. Isker áielder úshin ortaq otbasylyq tabys shegi 320 000 teńgeden 640 000 teńgege deiin kóterildi, dep habarlaidy QazAqparat.
Áleýetti qaryz alýshynyń ai saiynǵy otbasylyq tabysy 550 000 teńgeden aspasa, ol 15%-dyq bastapqy jarnamen nesie ala alady.
Al otbasynyń ortaq kirisi aiyna 550 001 teńgeden 630 000 teńgege deiingi aralyqta bolsa, onda turǵyn úidi 20%-dyq alǵashqy jarnamen alýǵa bolady.
Baǵdarlama boiynsha beriletin zaemnyń eń joǵarǵy quny 30 mln teńgege deiin. Paiyzdyq mólsherleme 13,5% (JTSM - 14,5%-dan bastap) teń, keiinnen 5%-ǵa deiin (JTSM - 5,2%-dan bastap) tómendetiledi.
«Umai» baǵdarlamasy boiynsha qaryz alý merzimi 6 aidan 25 jylǵa deiin.
Bul rette turǵyn úi tańdaýda shekteýler joq, ony alǵashqy jáne ekinshi naryqtan, sonyń ishinde úlestik qatysý sharttary boiynsha satyp alýǵa bolady.
Sondai-aq «Umai» boiynsha baspanany jóndeý jumystaryna da 3,7 mln teńgege deiingi mólsherde qaryz alýǵa bolady.
Genderlik teńdikti jetildirýge negizdelgen áielder baǵdarlamasy – Otbasy bank pen Aziia damý bankiniń birlesken jobasy.
Ony iske asyrýǵa ADB 38 mlrd teńge kóleminde qarajat bólýdi kózdep otyr. 2021 jyly «Umai» baǵdarlamasy bastalǵan kezde, birinshi transh aiasynda, jalpy kólemi 8,4 mlrd teńgege 954 qazaqstandyq qyz-kelinshek qaryz aldy.
Atalmysh ónimge degen suranys ásirese Nur-Sultan, Qaraǵandy jáne Aqtóbe oblystarynyń turǵyndary arasynda kóbirek bolatyn.
Aýdarylatyn ekinshi transh kólemi – 14 mlrd teńgege teń bolmaq. Biyl nesie alý týraly ótinishter naýryz aiynyń ortasynan qabyldanady.
Bul týraly Otbasy bank klientterine qosymsha habarlaidy. Osy jyly ADB qaryz qarajatyn joǵary mólsherleme boiynsha ornalastyratyndyqtan, qaryz alýshylar úshin ol jyldyq 13,5%-ǵa deiin ulǵaityldy.
«Umai» baǵdarlamasy – birinshi turǵyn úi satyp alýǵa múmkindik beretin memlekettik baǵdarlama emes.
Ol turǵyn úi jaǵdaiyn jaqsartý nemese balalaryna jyljymaityn múlik satyp alý maqsatymen, ekinshi nemese úshinshi turǵyn úi satyp alýdy kózdep otyrǵan, kirisi joǵary áielderge arnalǵan.
Elimizdiń kóptegen qyz-kelinshekteri Otbasy bankinen alǵashqy jarnasy tómen, balabaqsha, mektep, jumysqa jaqyn bolatyn jerden, iaǵni ekinshi naryqtan turǵyn úi alýǵa múmkindik beretin baǵdarlama shyǵarýdy suraǵandyqtan, «Umai» baǵdarlamasy paida boldy.
Búgingi tańda Otbasy bankiniń nesielik portfelindegi áielderdiń úlesi qaryz alýshy erlermen salystyrǵanda joǵary.
Máselen, qaryzdar sany boiynsha áielderdiń úlesi – 57% bolsa, nesie somasy men bereshek qaldyǵy boiynsha – 53% teń.
Sońǵy 5 jyl ishinde áielder Otbasy bankinen kreditti erlerge qaraǵanda belsendirek alýda, olardyń kredittik portfeldegi úlesi ózgerissiz 55-57% deńgeiinde.
