Úkimette sý tasqynyna qarsy is-sharalardy úilestirý jáne sý tasqyny kezeńiniń zardaptaryn joiý jónindegi respýblikalyq shtabtyń otyrysy ótti, dep habarlaidy "Ult aqparat" úkimettiń baspasóz qyzmetine silteme jasap.
Shtab jumysy aiasynda premer-ministrdiń orynbasary – ulttyq ekonomika ministri Nurlan Baibazarov tabiǵi sipattaǵy tótenshe jaǵdailardan zardap shekkenderge keltirilgen ziiandy óteýge qarajat jergilikti atqarýshy organdar rezervinde kózdelgenin baiandady.
“Zalaldyń aldyn ala mólsherin jergilikti atqarýshy organdar, ónerkásip jáne qurylys, sondai-aq tótenshe jaǵdailar ministrlikteri aiqyndaidy. Qosymsha qajettilik týyndaǵan jaǵdaida qarjylandyrý úkimet rezervinen qarastyrylady”, - delingen habarlamada.
Is-áreket algoritmi:
- materialdyq zardap shekkender tótenshe jaǵdai týyndaǵan kúnnen bastap kúntizbelik 30 kún ishinde jergilikti atqarýshy organdarǵa materialdyq zalaldy óteý týraly ótinish beredi.
- jergilikti atqarýshy organ ótinish tirkelgen kúnnen bastap 10 jumys kúni ishinde keltirilgen zalaldyń mólsherin baǵalaidy.
Turǵyn úii qaýipti dep tanylǵan zardap shekken azamattardyń tizimin jergilikti ákimdikter jasaidy.
Buǵan deiin Aqtóbe oblysynda kóktemgi sý tasqyny saldarynan keltirilgen zalaldy anyqtaityn arnaiy komissiia jumysyn bastaǵanyn habarlaǵan edik.
"Komissiia ókilderi sý tasqynynan qansha adamnyń zardap shekkenin, qansha úi men nysanǵa zaqym kelgenin, barlyq shyǵyn kólemin eseptep, sheshim shyǵarady. Úii apatty dep tanylǵan zardap shekken azamattardyń tizimin jasaýǵa jergilikti ákimdikter jaýapty", - delingen oblys ákimdiginiń baspasóz qyzmetiniń habarlamasynda.
Sonymen qatar "Qazaqstan halqyna" qory elimizdegi sý tasqynynan zardap shekkenderge 5 mlrd teńge bóledi. Bul qarajat úi salýǵa jumsalady.
