2 qarashada Qazaqstanda 449 adamǵa koronavirýs juqqany testpen rastaldy. Bir kúnde 202 adam jazyldy. Densaýlyq saqtaý ministrliginiń 3 qarasha tańerteń taratqan habarlamasynda osylai dep jazylǵan.
Ótken táýlikte eń kóp naýqas Shyǵys Qazaqstan oblysynda (226) tirkelgen. Pavlodar oblysynda - 40, Soltústik Qazaqstan oblysynda - 34, Aqmola oblysynda - 28, Almaty qalasynda 25 adamnan koronavirýs infektsiiasy tabylǵan. Túrkistan, Qyzylorda, Mańǵystaý oblystarynda jáne Shymkent qalasynda birde-bir naýqas anyqtalmaǵan.
Qazaqstanda naýryz aiynan beri koronavirýs juqqany PTR-testpen rastalǵandar sany 113 309 adamǵa jetti. 106 myńnan astamy jazylǵan. Naýryz aiynan beri keminde 1857 adam qaitys bolǵan.
Al, diagnozy tek aýrý belgileri boiynsha qoiylatyn koronavirýs pnevmoniiasy 38 myńnan astam adamnan anyqtalǵan, 402 adam qaitys bolǵan. Úkimet koronavirýs pnevmoniiasy dereginiń aimaq boiynsha bólinisin júieli túrde jariialamaidy.
Djons Hopkins ýniversiteti sekildi kóptegen álemdik uiymdar men derekkózder Qazaqstannyń deregin PTR testimen rastalǵan naýqastarǵa ǵana súienip berip otyr.
Aita keteiik, Qazaqstannyń birqatar oblystarynda shekteý sharalary kúsheidi. Qaraǵandy, Shyǵys Qazaqstan, Pavlodar oblystary aýmaǵyna kirip-shyǵý úshin jolaýshylar qolynda PTR-test nátijesi bolýy tiis. Sonyń kesirinen 2 qarashada Óskemen men Semeide koronavirýsty anyqtaityn zerthanalarda uzyn-sonar kezek paida bolyp, adamdar oblys aýmaǵynan shyǵý úshin PTR-test anyqtamasyn ala almai qinalǵan.
