Qazaqstanda ótken táýlikte 2443 adamnyń analizinen koronavirýs anyqtaldy. Almatyda – 651, Nur-Sultanda 398 naýqas tirkelgen. Aimaqta táýliktik kórsetkish boiynsha Qaraǵandy oblysy (245) men Almaty oblysy (200) alda tur.
Seisenbi, 4 mamyrda 43 adam kóz jumǵan: 37 adam – koronavirýstan, 6 adam koronavirýs pnevmoniiasynan qaitys boldy dep aitylady. Bir kúnde 177 adamǵa koronavirýs pnevmoniiasy diagnozy qoiylǵan.
6 mamyrdaǵy málimet boiynsha, Qazaqstanda 43 253 adam koronavirýs infektsiiasynan (42 792 KVI+ jáne 461 KVI-) emdelip jatyr.
Olardyń ishinde 14 489 patsient statsionarda, 28 764 naýqas ambýlatoriialyq deńgeide em qabyldaýda.
KVI+, KVI- shaldyqqandardyń arasynda:
• 780 adamnyń jaǵdaiy aýyr,
• 195 patsienttiń jaǵdaiy óte aýyr,
• 121 naýqas jasandy tynys alý apparatynda jatyr.
2020 jyldyń naýryz aiynan beri 334 812 adamnyń koronavirýs testi oń shyqqan. Densaýlyq saqtaý ministrligi koronavirýs pen koronavirýs pnevmoniiasy deregin biriktirmei, bólek jariialap júr. Qazaqstan biligi koronavirýs pnevmoniiasyna shaldyqqandardy 2020 jyldyń 1 tamyzynan beri tirkep keledi. Sodan beri 53 299 adamǵa koronavirýs pnevmoniiasy diagnozy qoiylǵan. 823 adam qaitys bolǵan.
Byltyr shilde aiynda elde indet órship turǵan shaqta Dúniejúzilik densaýlyq saqtaý uiymy Qazaqstanda jaiylyp bara jatqan "óte qaýipti" pnevmoniiany koronavirýstyń naqtylanbaǵan túri dep ataǵan. Osydan soń bilik koronavirýsqa uqsas pnevmoniianyń esebin júrgize bastady.
Resmi málimet boiynsha, Qazaqstanda 3833 adam koronavirýstan qaitys bolǵan.
Qazaqstanda koronavirýsqa qarsy vaktsinanyń alǵashqy dozasyn alǵandar 1 mln 565 myń adamǵa jetti. 460 myńyna vaktsinanyń eki dozasy salynǵan. Qazir halyqqa reseilik "Spýtnik V", QazVac jáne BAÁ elinde jasalǵan Qytaidyń Sinopharm kompaniiasynyń ekpesi salynyp jatyr.
Amerikalyq Djons Hopkins ýniversitetiniń málimetinshe, álemde 154,7 mln adamǵa koronavirýs juqqan. Jartysynan astamy jazylǵan. 3,23 mln adam qaitys bolǵan.
