Qazaqstan Densaýlyq saqtaý ministrliginiń 29 naýryz tańerteńgi saǵat 11.35-tegi deregi boiynsha, elde 22 adamnan koronavirýs anyqtalǵan: Nur-Sultanda - 16 adam, Almatyda - 4 adam, Atyraý oblysynda - 1 adam, Qyzylorda oblysynda - 1 adamnan virýs tabylǵan.
Elde naýqastar sany 251 adamǵa jetti. Barlyǵy 18 adam (Nur-Sultan - 13, Almaty - 5) aýrýdan jazylǵan. 26 naýryzda Aqmola oblysy Qosshy aýylynda 65 jastaǵy áiel adam koronavirýstan qaitys bolǵan.
Qazaqstanda 28 naýryz 22:00-ge deiin 78 adamnan virýs tabylǵany belgili boldy. Buǵan deiin elde bir kúnde munsha adamnan virýs tabylmaǵan.
Virýs juqtyrǵan 251 adam myna qalalarda:
- Nur-Sultanda - 151 adam
- Almatyda - 64 adam
- Qaraǵandyda - 7 adam
- Aqmola oblysynda - 6 adam
- Atyraý oblysynda - 6 adam
- Almaty oblysynda - 4 adam
- Jambyl oblysynda - 3 adam
- Shymkentte - 2 adam
- Shyǵys Qazaqstan oblysynda - 2 adam
- Aqtóbe oblysynda - 1 adam
- Soltústik Qazaqstan oblysynda - 1 adam
- Pavlodar oblysynda - 1 adam
- Mańǵystaý oblysynda - 1 adam
- Qyzylorda oblysynda - 2 adam.
Qazaqstanda koronavirýsqa bailanysty 15 sáýirge deiin tótenshe jaǵdai jariialanǵan. 28 naýryzdan bastap Almaty, Nur-Sultan, Shymkent qalalarynda saqtyq sharalary kúsheitildi. Bul qalalarda jurt tek tamaq, dári alýǵa jáne jumysqa shyǵa alady. Al 30 naýryzdan – 5 sáýir aralyǵynda Nur-Sultanda demalys jariialandy. Bul aralyqta qalada qoǵamdyq kólik júrmeidi. Tek dárigerler, politseiler, organ qyzmetkerleri men kommýnaldyq qyzmet ókilderi ǵana jumysqa shyǵady. Úkimet 30 naýryzdan bastap Aqtaý qalasyn karantinge jappaq. Qalada jurttyń júrip turýyna shekteý qoiylady.
