Qazaqstanda 10 mamyrda 1766 adamnyń analizinen koronavirýs anyqtaldy. Bul aldyńǵy kúnmen salystyrǵanda shamamen 400 adamǵa az. Ádette demalys kúnderinen keiin salystyrmaly túrde az naýqas tirkeledi. Bul sondai qubylystyń kórinisi bolýy múmkin. Densaýlyq saqtaý ministrligi koronavirýs pnevmoniiasy men adam ólimi boiynsha eki kún burynǵy málimetti jariialap keledi. 9 mamyrda 25 adam ólimi tirkelgen: 20 adam – koronavirýstan, 5 adam koronavirýs pnevmoniiasynan qaitys boldy dep aitylady.
Ótken táýlikte Almatyda – 430, Qaraǵandy oblysynda – 262, Nur-Sultanda – 249, Almaty oblysynda – 125, Pavlodar oblysynda – 119, Aqmola oblysynda 114, Batys Qazaqstan oblysynda 108 adamnan koronavirýs anyqtaldy. Shymkentte – 75, Aqtóbe oblysynda – 24, Atyraý oblysynda – 38, Shyǵys Qazaqstan oblysynda – 79, Jambyl oblysynda – 42, Qostanai oblysynda – 25, Qyzylorda oblysynda – 27, Mańǵystaý oblysynda – 13, Soltústik Qazaqstan oblysynda – 12, Túrkistan oblysynda 24 naýqas tirkelgen.
Elde koronavirýs alǵash anyqtalǵaly beri (2020 jyldyń 13 naýryzy) 346 497 adamnyń Covid testi oń shyqqan. 3948-i qaitys bolǵan. Úkimet qurǵan arnaiy komissiia aǵzasynan virýs tabylsa da "koronavirýstan emes, basqa aýrýdan qaitys boldy" degen 1,5 myńnan astam adam ólimi resmi statistikaǵa engizilmegen.
Qazaqstan biligi pnevmoniianyń koronavirýsqa uqsas túrin ótken jyldyń 1 tamyzynan beri esepke ala bastady. Sodan beri 53 571 adamǵa koronavirýs pnevmoniiasy diagnozy qoiylǵan. 837-i qaitys bolǵan.
Vashington (AQSh) ýniversiteti meditsina mektebiniń densaýlyq kórsetkishteri jáne baǵalaý institýtynyń (IHME) zertteýinde Qazaqstanda koronavirýs infektsiiasynan qaitys bolǵandar sany resmi statistikada kórsetilgennen 14,5 ese kóp ekeni aitylǵan. IHME esebi boiynsha, Qazaqstanda Covid-19 saldarynan 81 696 adam qaitys bolǵan.
9 mamyrda Qazaqstan densaýlyq saqtaý ministrligi IHME esebinde kórsetilgen málimetti joqqa shyǵardy. Ministrlik "pandemiia bastalǵannan beri Qazaqstanda koronavirýs infektsiiasynan 6575 adam qaitys boldy" dep málimdedi.
Ulttyq statistika biýrosynyń derekterine silteme jasaǵan ministrlik, "2020 jyldyń qorytyndysy boiynsha koronavirýs infektsiiasynan - 4729 adam, al 2021 jyldyń 4 aiynda odan 1846 adam qaitys boldy" degen derek keltirdi.
Ulttyq statistika biýrosynyń málimeti boiynsha, 2020 jyly 11 aida Qazaqstanda barlyǵy 149 myńnan astam adam qaitys bolǵan. Bul 2019 jylǵy sondai kezeńmen salystyrǵanda 27 myń adamǵa (22%) artyq. Densaýlyq saqtaý ministrligi byltyrǵy artyq ólim-jitimniń arasynda koronavirýs infektsiiasynan qaitys bolǵan 4729 adamda qospaǵanda, ózgeleriniń ajaly basqa dertten: qan ainalymy júiesiniń, tynys alý organdarynyń, júike júiesiniń aýrýlary, juqpaly jáne parazittik aýrýlardan bolǵan deidi.
11 mamyr kúngi málimet boiynsha, Qazaqstanda 1,6 mln adamǵa koronavirýsqa qarsy vaktsinanyń keminde alǵashqy dozasy salynǵan. 625 myńnan astam adam vaktsinanyń eki dozasy salynǵan.
Sondai-aq, 11 mamyrdaǵy málimet boiynsha, elimizde 41 094 adam koronavirýs infektsiiasynan (40 692 KVI+ jáne 402 KVI-) em alyp jatyr.
Onyń ishinde 15 068 patsient statsionarda, 26 026 naýqas ambýlatoriialyq deńgeide em qabyldaýda.
Koronavirýsqa shaldyqqandar arasynda:
• 802 adamnyń jaǵdaiy aýyr
• 186 patsienttiń jaǵdaiy óte aýyr
• 105 naýqas ÓJJ apparatynda jatyr.
Amerikalyq Djons Hopkins ýniversitetiniń málimeti boiynsha, álemde koronavirýs juqtyrǵandar 158,6 mln adamǵa jetken. 3 mln 299 myń adam virýstan qaitys bolǵan. 94,6 mln adam jazylǵan.
