QR Oqý-aǵartý ministrligi elimizdiń kolledjderinde syrttai oqytýǵa arnalǵan mamandyqtar tizimin qysqartty. Endi stýdentter tek 23 mamandyq boiynsha oqi alady, dep habarlaidy "Ult aqparat" vedomstvonyń baspasóz qyzmetine silteme jasap.
"Salystyrmaly túrde aita ketsek, eki jyldan astam ýaqyt buryn 595 biliktilik boiynsha syrttai bilim alýǵa bolatyn edi. Biraq oqytýdyń bul túri stýdentterge sapaly mashyqtardy, daǵdylardy bere almaidy. Osynyń saldarynan túlekter oqýdy bitirgennen keiin praktikalyq bilimniń jetispeýshiligimen jii kezdesip, jumys taba almai jatady. Osyǵan bailanysty ministrlik syrttai oqýdaǵy mamandyqtardy qysqartý boiynsha jumysty kezeń-kezeńimen júrgizip jatyr" - delingen habarlamada.
Bul joly «Radioelektrondy kólik quraldaryn paidalaný jáne tehnikalyq qyzmet kórsetý (kólik túri boiynsha)» siiaqty mamandyqtar boiynsha, sondai-aq «Tehnik-elektronik» biliktiligi, «Tehnik-tehnolog biliktiligi boiynsha «Paidaly qazbalardy óńdeý (kómir daiyndaý)», «Tehnik-qurylysshy» biliktiligi boiynsha «Qalalyq kommýnikatsiialardy salý jáne paidalaný», «Tazalaý qurylystarynyń tehnolog-tehnology biliktiligi boiynsha «Sýmen jabdyqtaý jáne sý burý júielerin tazartý qurylystaryn paidalaný» jáne t.b. biliktilik boiynsha syrttai oqytý alynyp tastalǵan.
«Búgingi tańda qazaqstandyq kolledjderde kadrlardy daiarlaýda dýaldy oqytý túri belsendi túrde damyp keledi. Iaǵni kadr daiarlaýda kolledjder iri kásiporyndarmen, biznespen tyǵyz bailanysta jumys isteidi. Óitkeni olarǵa qandai mamandar qajet ekenin eńbek naryǵy anyqtaidy. Sondyqtan biz syrttai oqý túrinen belsendi túrde alshaqtap jatyrmyz jáne mundai sheshim qabyldaýǵa túlekterdiń oqýdy bitirgennen keiin alatyn bilim men daǵdylardyń sapasynyń jetkiliksizdigi sebep boldy. Biz muny kezeń-kezeńimen júrgizip jatyrmyz jáne bul jumys áli de jalǵasyn tabady. Dýaldy oqytý kezinde óndiristik oqytý men kásiptik praktikanyń keminde 60%-y qamtamasyz etiletinin, osylaisha stýdentterdiń oqý ýaqytynyń jartysynan kóbi óndiriste bolatynyn atap ótemin. Bul tásil bolashaq túlekterdiń bilim sapasy men biliktiligin arttyrady jáne olardyń ári qarai jumysqa ornalasýyn qamtamasyz etedi», - dedi QR Oqý-aǵartý ministrligi Tehnikalyq jáne kásiptik bilim departamenti direktorynyń mindetin atqarýshy Ernat Júnisov.
