Buryn keibir jeke sot oryndaýshylar májbúrlep oryndatý merzimin sozatyn jaǵdailar bolatyn. Endi olar aliment máselesimen birinshi kezekte ainalysady, dep habarlaidy "Ult aqparat" QR Ádilet ministrliginiń baspasóz qyzmetine silteme jasap.
Osy jyldyń 27 maýsymynda Qazaqstan Prezidenti «Qazaqstan Respýblikasynyń keibir zańnamalyq aktilerine atqarýshylyq is júrgizýdi jáne qylmystyq zańnamany jetildirý máseleleri boiynsha ózgerister men tolyqtyrýlar engizý týraly» Zańǵa qol qoidy.
Zańda atqarýshylyq is júrgizýdiń sapasyn jaqsartý jolymen azamattardyń quqyqtaryn qorǵaý men ýaqytyly iske asyrýdy, atap aitqanda áleýmettik mańyzy bar ister sanattary boiynsha qamtamasyz etýge, asa nazar aýdarylady.
«Qabyldanǵan túzetýlermen jeke sot oryndaýshylarynyń alimentterdi, jalaqyny, zeinetaqyny, járdemaqylardy óndirip alý týraly, azamattardyń ómiri men densaýlyǵyna keltirilgen ziiandy óteý týraly atqarýshylyq qujattardy oryndaýdyń basymdyǵy bekitildi», - dep habarlaidy ministrlikten.
Buryn keibir jeke sot oryndaýshylar, olardy asa qyzyqtyrmaǵandyqtan májbúrlep oryndatý sharalaryn qoldaný merzimin sozatyn jaǵdailar bolatyn. Endigide, sot oryndaýshysy bir ai ishinde májbúrlep oryndatý sharalaryn qabyldamasa litsenziiasynan aiyrylýy múmkin.
Budan basqa memlekettik eńbek inspektorynyń jalaqyny tóleý týraly uiǵarymyna atqarýshylyq qujat mártebesi beriledi.
Bul shara quqyqtaryn jumys berýshi buzǵan azamattarǵa jalaqyny óndirip alý máselelerin tez sheshýge, sotqa jumsalatyn ýaqyty men sot shyǵyndaryn únemdeýge múmkindik beredi.
Zań 2020 jylǵy 8 shildede, alǵash resmi jariialanǵan kúnnen keiin kúntizbelik on kún ótken soń kúshine endi.
