Sońǵy qońyraý aiasynda muǵalimderge syilyq alýǵa tyiym salynǵan. Bul týraly QR Bilim jáne ǵylym vitse-ministri Sholpan Karinova málim etti, dep habarlaidy "Ult aqparat".
«Sońǵy qońyraý ádettegidei 25 mamyrda ótkiziledi. Biylǵy shekteý is-sharalary eskerilip, birneshe format usynylmaq. Birinshiden, dástúrli túrde ashyq taza aýada 9 jáne 11-synyp oqýshylary úshin, sondai-aq 300-ge deiin oqýshysy bar ári osy ýaqytqa deiin shtattyq rejimde oqytyp kele jatqan mektepter ótkize alady. Sonymen qatar, eki nusqa usynylyp otyr, iaǵni synyp ishinde nemese onlain túrde ótkizý qarastyrylǵan. Qajet dep sanasa, synyp ishinde ótkizý nusqasy usynylady. Al qashyqtan oqytyp jatqandar úshin sońǵy qońyraý merekesi onlain rejimde bolady», - Sh. Karinova ministrliktiń apparat jinalysynda.
Munymen qosa ol oqý jylynyń aiaqtalýyna bailanysty pedagogikalyq qaǵidatty saqtaý úshin ártúrli syilyqtardy alýǵa ruqsat etilmeitinin eske saldy.
«Jalpy, sońǵy qońyraýdy ótkizýdiń negizgi maqsaty – barlyq mektep oqýshylary úshin belgili bir synypty aiaqtap, kelesi synypqa ótý jáne jazǵy demalystyń bastalýy. Al mektep túlekteri 9 jáne 11 synyptar úshin mektep bitirý is-sharasy bolyp sanalady. Atap aitqanda, shtattyq rejimde (sońǵy qońyraý) ótkiziletin jaǵdaida barlyq sanitarlyq talaptardyń qatań saqtalýyn mektep ákimshiligi nazarǵa alýy tiis. Ár oqýshymen, ár mektep bitirýshimen keletin ata-ananyń sany birden aspaýy kerek. Munyń ózi sanitarlyq talaptardy saqtaýǵa múmkindik beredi», - dedi vitse-ministr.
