Qazaqstanda 2010 jyly túrmede jazasyn óteýshi azamattardyń sany 63 myń bolsa, qazirgi ýaqytta olardyń sany 30 myńǵa deiin azaiǵan. Mundai statistikany Qylmystyq atqarý júiesi komitetiniń tóraǵasy Janat Eshmaǵambetov keltirdi, dep habarlaidy QazAqparat.
«Ózderińiz biletindei, eýropalyq elderdiń tájiribesine súiene otyryp, Qylmystyq, Qylmystyq-protsessýaldyq, Qylmystyq-atqarý kodeksteri men «Probatsiia týraly» zańdy qabyldaý jolymen Qazaqstan oqshaýlaýmen bailanysy joq qylmystyq jaza túrlerin qoldaný aiasyn keńeitip keledi. Osydan on jyl buryn, 2010 jyly túrmede jazasyn óteýshilerdiń sany boiynsha Qazaqstan 31-shi orynda turǵan edi. Qazir biz 100-shi oryndamyz. Naqtyraq aitqanda, elimizde 100 myń adamǵa shaqqandaǵy túrmede jazasyn óteýshilerdiń sany 202 adamdy quraidy», - dedi Janat Eshmaǵambetov IX Azamattyq forým jumysynyń taqyryptyq sessiiasynda.
Iaǵni 2010 jyly Qazaqstanda túrmede jazasyn óteýshilerdiń sany 63 myń bolsa, qazirgi ýaqytta eki ese azaiyp, 30 myńdy qurap otyr. Al probatsiiaǵa jatatyn azamattardyń sany 33 myńnan 60 myńǵa deiin artqan.
«Qazaqstanda probatsiia institýty memlekettik jáne jergilikti atqarýshy organdardyń, qoǵamdyq birlestikterdiń ókilderiniń qatysýymen júzege asyp keledi. Bizdiń zańnama probatsiianyń tolyqqandy tsiklyn jolǵa qoiǵan», - deidi ol.
