Búgin Qazaqstan-Slovakiia biznes-forýmynda QR Premer-Ministri Baqytjan Saǵyntaev eki eldiń arasyndaǵy saýda-ekonomikalyq yntymaqtastyqty damytý úshin barynsha qoldaý jasalatynyn málim etti, dep habarlaidy QazAqparat.
«Slovakiia Ortalyq Eýropadaǵy Qazaqstannyń mańyzdy seriktesteriniń biri bolyp otyr. Bizdi bailanystyratyn ortaq basymdyqtar kóp. Osy oraida ekonomikanyń indýstrialdyq-agrarlyq baǵyty, damyǵan adami kapital, tiimdi geografiialyq ornalasý sekildi uqsastyqtar bar. Biyl biz eki eldiń arasynda diplomatiialyq qatynastardy ornatýdyń 25 jyldyǵyn atap ótýdemiz. Qazaqstan men Slovakiia arasyndaǵy dostyq pen seriktestiktiń osy merziminde senimdi saiasi dialog qalyptasyp, saýda-ekonomikalyq ári mádeni-gýmanitarlyq yntymaqtastyqty damytý úshin qolaily jaǵdailar jasaldy», - dedi B. Saǵyntaev.
Bul turǵyda Úkimet basshysy saýda-ekonomikalyq saladaǵy bailanystarda jaqsy qarqyn baiqalyp jatqandyǵyn aita kele, búginde Qazaqstanda slovakiialyq kapitaldyń qatysýymen 60-tan astam kásiporyn tirkelgenin jetkizdi.
«Biz aldaǵy ýaqytta da saýda-ekonomikalyq ári investitsiialyq qatynastardy keńeitýge múddelimiz. Ol úshin bizde barlyq jaǵdailar jasalǵan. Búginde Qazaqstan tiimdi biznes júrgizýde jańa múmkindikter men aýqymdy áleýettiń memleketine ainaldy. Bizdiń EAEO múshesi ekenimizdi bilesizder, bul rette 180 million adamdy qamtyp turǵan úlken naryq bar», - dedi Baqytjan Saǵyntaev.
Sonymen qatar ol birlesken jumystardy júrgizýge qos taraptyń da isker toptary qyzyǵýshylyq tanytyp otyrǵandyǵyn atap ótti.
Óz kezeginde Slovakiia Premer-Ministri Peter Pellegrini eki el arasyndaǵy ózara ekonomikalyq qatynastardy damytýǵa múddeli ekendikterin jetkizdi. Sondai-aq ol slovakiialyq kásipkerlerge Qazaqstanda qolaily jaǵdailar jasalǵanyn da rastady.
«Biz ekonomikalyq bailanystardy talqylaǵan kezde, Qazaqstan Slovakiia úshin Ortalyq Aziia óńirinde basymdyqqa ie ekenin atap ótken jón. Yntymaqtastyqty nyǵaitýda jańaratyn energetika, avtomobil ónerkásibi, mashina jasaý, sýdy tazartý tehnologiiasy, azyq-túlik ónimderin óndirý sekildi salalardyń áleýeti joǵary», - dedi P. Pellegrini.
Taratylǵan málimetterge qaraǵanda, Qazaqstan men Slovakiia arasyndaǵy syrtqy saýda ainalymy 2018 jyldyń 8 aiynda 13,9 paiyzǵa ósip, 33,5 mln AQSh dollaryna jetti.
