Qazaqstanda sintetikalyq esirtki jasyryn zerthanalarda óndirile bastady. Bul týraly QR IIM Esirtki qylmysyna qarsy is-qimyl departamentiniń basqarma bastyǵy Baqytjan Ámirhanov aityp berdi, dep habarlaidy QazAqparat.
Onyń aitýynsha, bastapqyda mundai esirtki tolyǵymen sheteldik óndiriletin jáne elge kontrabandalyq jolmen nemese poshtalyq jáne logistikalyq kólik arnalary arqyly jetkizilgen. Keide «sintetika» qurastyrmaly túrde – iaǵni zańdy himiialyq zattar túrinde ákelinip, esirtkiniń az dozalary shyǵarylǵan.
«Alaida, qazirgi «qara» naryqty taldaý kezinde esirtki satýshylardyń el ishinde jasyryn zerthanalarda sintetikalyq esirtki óndirisin bastaǵany anyqtaldy. Birneshe jyl buryn eldegi esirtki ahýalyna pármendi áreket etýge múmkindik bergen zańnamalyq bastamalar paketi qabyldandy», - dedi Baqytjan Ámirhanov ministrlik uiymdastyrǵan onlain-brifingte.
Spikerdiń málimetinshe, 2019 jyldan bastap ishki ister organdary 35 esirtki zerthanasyn joiyp, 182 kg «sintetika» tárkiledi. Barlyq jaǵdailarda himiialyq prekýrsorlar, reagentter men zerthanalyq jabdyqtar Qazaqstanǵa logistikalyq kompaniialarmen, kórshi elderdiń poshta jóneltilimderimen jetkizilgen. Sondyqtan IIM kólik-logistikalyq kompaniialarmen tyǵyz bailanysyp, kúdikti jóneltilimderdi anyqtaidy.
«Ótken aida elordada «Family Village« kottedj qalashyǵyndaǵy úilerdiń birinde esirtki óndirisin bastap, kóterme satýmen ainalysqan jergilikti turǵyndar ustaldy. Sol kezde 1200 «Ekstazi» tabletkasy, 2 kg «Alfa-PVP» jáne 140 litr prekýrsorlar alyndy. Salmaǵy 1,2 kg bolatyn 2 sintetikalyq zat joiyldy, tek osy fakt boiynsha 4 kg sintetikalyq esirtki tárkilendi», - dedi Baqytjan Ámirhanov.
Eki aida politseiler 370-ten astam esirtki qylmysyn anyqtady, 7 esirtki zerthanasyn joidy, 420 kg-nan astam esirtki, onyń ishinde 196 kg gashish, 213 kg marihýana jáne 6 kg-nan astam sintetikany tárkilegen.
