Ótken jyly Qazaqstanda sibir jarasynyń taralýyna sapasyz ekpe sebep boldy, dep habarlaidy Ult.kz tilshisi QazAqparat agenttigine silteme jasap.
«2016 jyly sibir jarasynyń Shyǵys Qazaqstan, Qaraǵandy, Batys Qazaqstan, Pavlodar oblystarynda bes oshaǵy tirkeldi. Osy oraida atalǵan indetke qarsy egilgen vaktsinalardyń úlgileri Ýkraina men Efiopiianyń halyqaralyq referenttik zerthanalaryna saraptamaǵa jiberildi. Zertteý nátijeleri vaktsinalardyń tiisti parametrlerge sáikes kelmeitindigin rastady. Materialdar quqyq qorǵaý organdaryna joldanyp, ekpeni jetkizýshi tarap óz mindetin adal atqarmaityn kompaniia retinde tanyldy», - dedi Úkimet otyrysynda QR Aýyl sharýashylyǵy birinshi vitse-ministri Qairat Aitýǵanov.
Onyń sózine qaraǵanda, sapasyz vaktsinany jetkizýshi 71 mln. teńge somasyndaǵy barlyq 13 mln. dozany aýystyrdy.
«Osyndai jaǵdaiǵa jol bermes úshin memlekettik satyp alýlar týraly shartqa tapsyrys berýshi belgilegen zerthanalarda jetkizýshi taraptyń esebinen ekpe sapasyn mindetti tekserý normasy engizildi», - dedi vitse-ministr.
Belgili bolǵandai, eger de ótken jylǵy 1 mamyrdaǵy jaǵdai boiynsha janýarlar indetiniń 36 oshaǵy tirkelse, aǵymdaǵy jyly 23 oshaǵy anyqtaldy, iaǵni 36 paiyzǵa tómendeý baiqaldy.
«2017 jyldyń veterinarlyq-profilaktikalyq is-sharalaryna sáikes, 17 asa qaýipti aýrýlarǵa qarsy 150 mln. ekpe jasaý josparlanǵan. Onyń ishinde jyl basynan qazirgi kezeńge deiin 60 mln. ekpe qarastyrylǵan», - dedi vitse-ministr.
Munymen qosa, janýarlardyń asa qaýipti aýrýlaryna qatysty 70 mln. diangnostikalyq tekserý júrgizý josparǵa engizildi.
