Qazaqstanda temeki shegýge tyiym salynǵan oryndar tizimi keńeitildi, dep habarlaidy "Ult aqparat" Habar24kz saityna silteme jasap.
Saittyń jazýynsha, jabyq avtobýs aialdamalarynda, balalar alańdarynda, metroda jáne jerasty ótkelderinde elektrondy temeki, kalian jáne temeki ónimderiniń barlyq túrlerin shegýge tyiym salynady.
«Bizdiń jastar kaliandy mekemelerde qoldanady. Endi olarǵa tolyqtai tyiym salyndy. Dámhanalarda, qoǵamdyq oryndarda, jazǵy kafelerde shege almaidy, ony tek úide ǵana tutynýǵa bolady», - dedi Alkogol jáne temeki ónimderin satý qaýymdastyǵynyń atqarýshy direktory Temirlan Jaqypbekov.
Buǵan deiin habarlanǵandai, endi temekini jáne kalianǵa arnalǵan túrli qospalardy 21 jastan bastap qana satyp alýǵa bolady. Satýshylar satyp alýshylardan jeke kýálikterin talap etýi kerek.
Taǵy bir jańalyq – temeki men kalian qospalary dúken sórelerinde bolmaidy. Bul ereje kelesi jyldan bastap kúshine enedi.
Kalianǵa qarsy shekteýlerge qaramastan, tek shilde aiynyń ózinde elordalyq politsiia 20 zańbuzýshylyqty tirkedi. Quqyq qorǵaý organdarynyń qyzmetkerleri kún saiyn reidter ótkizedi.
Kalian men temekini ruqsat etilmegen jerde shekkeni úshin aiyppul salynýy múmkin. Aiyppul mólsheri eki esege artyp, 42 myń teńgeni quraidy.
