Qazaqstanda shaǵyn biznesti kásipkerlerdiń ulttyq palatasyna tóleitin múshelik jarnadan bosatý máselesi kóterildi, dep habarlaidy QazAqparat.
«Transformatsiialaý jónindegi jumys toby shaǵyn biznesti múshelik jarna tóleýden bosatýdy usyndy. Búgingi tańda 21 myńnan astam shaǵyn biznes sýbektisi bar. Iaǵni jalpy biznestiń 74% -y mindetti múshelik jarna tóleidi. Osy oraida jarnadan túsetin paida 1,2 mlrd teńgeni qurap otyr. Eger atalǵan usynys búgingi sezde qoldaý taýyp, sheshim qabyldansa, onda ulttyq kásipkerler palatasyna múshelik jarna tóleýshilerdiń sany 29 myńnan 7 myńǵa deiin azaiady. Iaǵni 4 esege qysqarady», - dedi «Atameken» UKP basqarma tóraǵasynyń birinshi orynbasary Nariman Ábilshaiyqov elordada ótip jatqan kezekten tys IH sezde.
Tóraǵa orynbasarynyń málimdeýinshe, atalǵan shara shaǵyn biznes úshin aitarlyqtai qoldaý.
«Óz kezegimizde 1,2 mlrd teńge túsim shyǵynyn palata shyǵynyn ońtailandyrý esebinen óteýdi usynamyz. Ulttyq kásipkerler palatasy týraly zańnyń 29 babyna sáikes, múshelik jarnalar sezd otyrysynda bekitiledi. Osylaisha shaǵyn biznes sýbektilerin ulttyq palataǵa mindetti múshelik jarnalardan bosatý týraly sheshim qabyldaýdy usynamyz. Jáne aldaǵy ýaqytta ulttyq kásipkerler palatasy týraly zańǵa tiisti norma engizilsin. Qoldaýlaryńyzdy suraimyn», - deidi ol.
