2021 jyly elimizdiń mashina jasaý salasy óńdeýshi ónerkásiptiń draiverine ainalyp, 20,4 paiyz ósim kórsetti, dep habarlaidy QazAqparat.
Energyprom.kz portalynyń málimetinshe, elimizde avtomobil ónerkásibi men avtomobil qurastyrý salasyna úlken úmit artylyp otyr.
Tipti, bul sala Qazaqstan indýstrializatsiiasynyń draiverine ainalýy da yqtimal.
Máselen, ótken jyly avokólik quraldaryn, treiler men jartylai tirkemelerdi qurastyrý 24,3 paiyzǵa, 739,1 mlrd teńgege deiin ósti.
Strategiialyq josparlaý jáne reformalar agenttigi ulttyq statistika biýrosynyń resmi derekterine qaraǵanda, ótken jyly elimizdiń mashina jasaý óndirisiniń jalpy kóleminde avtokólik quraldary, treiler men jartylai tirkemeler qurastyrý 2 óńirde basymdyqqa ie boldy: Qostanai oblysynda – 79,7 paiyz (395,9 mlrd teńge), Almatyda — 62,6 paiyz (246,9 mlrd teńge).
Qostanai oblysynda «SaryarqaAvtoÓnerkásip» avtozaýyty, Almatyda Hyundai Trans Kazakhstan men Hyundai Trans Almaty zaýyttary jumys isteidi.
Avtoónerkásipte Shyǵys Qazaqstan men Aqmola oblystarynyń da úlesi basym.
Qazaqstan avtomobil biznesi qaýymdastyǵynyń málimetterine qaraǵanda, QR avtoónerkásip óndirisiniń kólemi 782,1 mlrd teńgeni qurady.
Al bir jyl buryn bul kórsetkish 612,8 mlrd teńge bolǵan edi.
Aita keterligi, Hyundai Trans Kazakhstan men Hyundai Trans Almaty zaýyttary bir jyldyń ishinde óndiristi úsh ese arttyryp otyr.
Atalǵan kásiporyndar 2020 jyly 100,4 mlrd teńgeniń, al ótken jyly 293,7 mlrd teńgeniń kóligin qurastyrǵan.
Elimizdiń 1 jyldyń ishinde avtomobil óndirisi 20 paiyzǵa artyp, 92,8 myń kólik qurastyryldy.
Pandemiiaǵa bailanysty logistikada týyndaǵan qiyndyqtarǵa, álemdegi jartylai ótkizgishter tapshylyǵyna qaramastan avtomobil satý 25,9 paiyzǵa artyp, 117,6 myń birlikke jetti.
Ótken jyly satylǵan kólikterdiń ishinde otandyq avtomobil úlesi basym túsip, 62,2 paiyzǵa jetti.
Qazaqstandyq avtomobilder eksporty da bir jyldyń ishinde 1,5 paiyzǵa artyp, 12,1 myń kólikti qurady.
