Azamattyq qoǵamdy kóleńkeli ekonomikaǵa qarsy is-qimylǵa tartý maqsatynda Memlekettik kirister komiteti birqatar pilottyq jobalardy júzege asyrýda. Bul týraly Ortalyq kommýnikatsiialar alańynda ótken baspasóz máslihatynda komitet basshysy Marat Sultanǵaziev aitty, dep habarlaidy QazAqparat.
Atap aitqanda, óz tabysyn jasyratyn azamattardy anyqtaýǵa baǵyttalǵan «Azamattyq baqylaý - túbirtek talap etý» jobasy júzege asyrylýda. Joba barysynda Wipon mobildi qosymshasy arqyly túbirtektiń berilmegeni týraly 16,5 myń habarlama kelip túsken. Onyń 5,5 myńy rastalyp, olar úshin 4,5 mln teńge kóleminde syiaqy tólengen.
Sonymen qatar Marat Sultanǵaziev «dári-dármekterge arnalǵan elektrondy shot-faktýra shyǵarý boiynsha» pilot týraly aityp ótti. Joba kez-kelgen túrdegi dári-dármekterdi baqylaý maqsatynda 2020 jyly bastalǵan. Qatysýshylar sany 6,7 myńǵa deiin ósken.
«Azamattyq belsendilikti arttyrýdyń taǵy bir mańyzdy jobasy – arnaiy beine jáne fotografiialyq quraldardy qoldanatyn «vizýaldy tekserý» piloty. QR kodtary MKK veb-saitynda jasalyp, onyń kómegimen satyp alýshy satýshyny anyqtai alady. Bul baǵyttaǵy túsindirý jumystary bastalyp ketti. EAEO sheńberinde taýar ainalymynyń baqylanýyn qamtamasyz etý maqsatynda 2021 jyldan bastap «Virtýaldy qoima» modýlinde resimdeletin taýarlarǵa ilespe qujattar shyǵarý jobasy bastaldy. Búgingi kúni birqatar problemalar anyqtaldy, biz olardy sheshýge kiristik. Pilot kezinde aiyppuldar qoldanylmaitynyn atap ótkim keledi», - dedi Marat Sultanǵaziev.
