Parlament Májilisiniń jalpy otyrysynda «QR Ákimshilik quqyq buzýshylyq týraly kodeksine bailanys máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaidy QazAqparat.
Atalǵan qujatty daiarlaýǵa Parlament depýtattary bastamashylyq jasady. Zań jobasynyń negizgi maqsaty - bailanys salasyndaǵy zańnamany odan ári jetildirý.
«Pandemiia jáne halyqtyń qashyqtan jumys isteýi rejimine kóshýi kezinde usynylatyn bailanys qyzmetteri sapasynyń mańyzdylyǵy arta tústi. Ol halyqtan kelip túsetin shaǵymdardyń kóbeiýinen baiqalyp otyr. Sonymen qatar, júrgizilgen tekserýler boiynsha anyqtalǵan zań buzýshylyqtar osyǵan bailanysty problemanyń bar ekenin dáleldeidi», - dedi QR Parlamenti Májilisiniń depýtaty Janna Telpekbaeva.
Ákimshilik quqyq buzýshylyq týraly kodekstiń 637-babyna sáikes, iri kásipkerlik sýbektisi úshin aiyppul 100 AEK-ti, bir jyldyń ishinde qaitalap jasalǵan quqyq buzýshylyq úshin 200 AEK-ti quraidy. Bul rette iri kásipkerlik sýbektisi zań buzýshylyq faktisin moiyndaǵan kezde, Ákimshilik quqyq buzýshylyq týraly kodekske sáikes 50 paiyz, iaǵni 50 nemese 100 AEK kóleminde aiyppul tóleýge quqyly.
«Kóbinese operatorlarǵa qosymsha jabdyqty ornatýdan nemese óz jelisin ózge de túrde damýǵa qaraǵanda, aiyppuldyń jarty kólemin tólegen yńǵailyraq. Osy oraida bailanysqa qatysty barlyq qolaisyzdyqtar operator aldyndaǵy óz mindettemelerin turaqty negizde oryndaityn, iaǵni tarifti tolyq kólemde tóleitin abonentterge áser etedi. Zań jobasy zańnamada belgilengen tehnikalyq parametrlerge sáikes kelmeitin bailanys pen internetke qol jetkizý qyzmetterin kórsetkeni úshin, iri kásipkerlik sýbektilerine ákimshilik aiyppuldardyń mólsherlerin ulǵaitý arqyly bailanys operatorlarynyń jaýarkershiligin kúsheitýge múmkindik beredi», - dedi depýtat.
