1 sáýirdegi jaǵdai boiynsha 14 794 sheteldik azamat jergilikti atqarýshy organdardyń ruqsatymen Qazaqstan Respýblikasynyń aýmaǵynda eńbek etip júr, dep habarlaidy "Ult aqparat" Eńbek jáne halyqty áleýmettik qorǵaý ministrligine silteme jasap.
Sheteldik jumys kúshin tartýǵa berilgen ruqsattardyń ishinde mynadai sanattar bar: birinshi sanat – 648 (basshylar jáne olardyń orynbasarlary), ekinshi sanat – 3 240 (qurylymdyq bólimshelerdiń basshylary). Sheteldik jumys kúshiniń negizgi bóligi úshinshi (mamandar) jáne tórtinshi (bilikti jumysshylar) sanattarǵa jatady – tiisinshe 7 397 adam jáne 491 adam. Sondai-aq maýsymdyq jumystarǵa – 1 329 adam, al korporativtik aýystyrý sheńberinde – 1 689 adam tartylǵan.
Qazirgi ýaqytta Qazaqstanda sheteldik jumys kúshin paidalanatyn 1 641 jumys berýshi bar. Olarda shamamen 489 myń Qazaqstan azamaty jumys isteidi, bul jalpy jumysshy sanynyń 97%-y.
Eńbekshi migranttar shyǵatyn negizgi elder kelesi: Qytai – 3 617 adam, Túrkiia – 1 490 adam, Úndistan – 1 098 adam, Ulybritaniia – 947 adam, Ózbekstan – 1 369 adam.
Esterińizge sala keteiik, ishki eńbek naryǵyn qorǵaý maqsatynda QR Eńbek jáne halyqty áleýmettik qorǵaý ministrligi jyl saiyn elimizge sheteldik mamandardy tartýǵa arnalǵan kvota belgileidi. 2021 jyly kvota mólsheri jumys kúshine shaqqanda 0,31%-dy nemese 29,3 myń birlik.
