Elimizde 15 sáýirden bastap tsifrlyq ónim men qyzmetter naryǵynyń qazaqstandyq segmentine arnalǵan programmister men ázirleýshilerdi daiyndaýǵa baǵyttalǵan QWANT bilim berý jobasy jumysyn bastaidy, dep habarlaidy QazAqparat.
«Astana» halyqaralyq qarjy ortalyǵy byltyrdan bastap AHQO biýrosy negizinde baǵdarlamashy injenerler men ázirleýshilerge arnalǵan mamandandyrylǵan baǵdarlamany júzege asyryp otyr. Mundaǵy basty maqsat – halyqaralyq sertifikattaý baǵdarlamalary men bilim berý tehnologiialary arqyly bilikti maman daiyndaý.
«QWANT joǵary tehnologiia mektebi Eýropa men AQSh-tyń eń úzdik baǵdarlamalaý mektepteriniń aldyńǵy qatarly tájiribelerin qamtityn Kremnii alqabynyń tsifrlyq platformasy – QWASAR arqyly biliktilik arttyrý men suranysqa ie kásip meńgerýge nietti barlyq azamatqa múmkindik usynady. QWANT-tyń oqytý ádistemesi tájiribelik bilim alý, ózara baǵalaý, jobalyq basqarý, geimifikatsiia jáne róldik modeldeý printsipterine negizdelgen. Oqý protsesi jumys barysyna barynsha jaqyn orta qalyptastyra otyryp qurylǵan. Al baǵdarlamaǵa qatysýshylar berilgen tapsyrmany jekelei de, toppen de oryndai otyryp kún saiyn mashyqtaryn shyńdai túsedi. Sonymen qatar oqý barysynda baǵdarlamalaý tiline tereńnen boilai otyryp, árbir qatysýshy avtomatty júie arqyly óz áriptesterine baǵa berip, úirete alady», - dep habardaidy AHQO baspasóz qyzmetinen.
QWANT jobasynda oqytýshylar men lektsiia joq. Júieniń ereksheligi - keń qamtylýy men qashyqtan jumys isteýge múmkindik berýinde. Bul oqý protsesiniń sapasyn saqtai otyryp barynsha kóp kandidatqa paidaly bilim berýge múmkindik beredi. 6 ai boiy QWANT baǵdarlamasy boiynsha sertifikat alý úshin irikteýden ótken kandidattar myna salalarda óz mashyqtaryn damytady: qoldanbaly baǵdarlamalaýdyń interfeisi, jasandy intellekti tájiribelik baǵdarlamalaý, veb-infraqurylym, mashinalyq oqý, mobildi qosymsha. Úmitkerlerge talaptar negizgi eki parametrmen qoiylady: baǵdarlamalaý negizderin bilý jáne aptasyna 40 saǵattan artyq ýaqyt boiy belsendi oqýǵa yntasynyń bolýy.
Ai ortasynda bastalatyn birinshi oqý baǵdarlamasyna ótinim qabyldaý 4 sáýirge deiin ashyq.
