Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine qaldyqtardy energetikalyq kádege jaratý máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaidy QazAqparat.
Zań jobasynyń tujyrymdamasynda turmystyq qatty qaldyqtardy jaǵý arqyly olardy kádege jaratý kózdeledi. Bul, qaldyqtardyń qorshaǵan ortaǵa teris áserin azaitýǵa jáne olardyń kómýge jatatyn kólemin qysqartýǵa múmkindik beredi.
«Zań jobasyna depýtattar qatty turmystyq qaldyqtardy órteý jolymen qaita óńdep, keiinnen elektr energiiasyn alý úshin quqyqtyq baza qurý maqsatynda bastamashylyq etti. Órteýge qaita óńdeýge jatpaityn qaldyqtardyń bir bóligi ǵana qamtylady. Jyl saiyn elimizde shamamen 5 mln tonna qaldyq paida bolady. Olardyń tek 15 paiyzy qaita óńdeledi. Qazir osy mindetti iske asyrý úshin búkil álemde qoqys jaǵatyn keshender jumys isteidi», - dedi Májilis depýtaty Quralai Qaraken.
Onyń sózine qaraǵanda, elimizde elektr energiiasyn óndirý arqyly qaldyqtardy termiialyq óńdeýden ótkizýge bolady. Mundai tásil el aýmaǵyndaǵy poligondardyń sany men alańyn qysqartýǵa ǵana emes, sondai-aq qaldyqtardy jaǵýdan ekologiialyq ári ekonomikalyq nátije alýǵa múmkindik beredi.
Zań jobasynyń mańyzdy aspektisi elektr energiiasyn alý úshin qaldyqtardy energetikalyq kádege jaratý boiynsha segmentti qoldaýǵa baǵyttalǵan normalar bolyp otyr. Qujattyń tujyrymdamasyna sáikes, negizgi qoldaý tetigi qoqys jaǵatyn kásiporyndar óndirgen elektr energiiasyn kepildi satyp alý bolyp tabylady. Ol jańartylatyn energetika salasyn qoldaýdyń qoldanystaǵy tetigine uqsas bolady.
Osyǵan bailanysty, zań jobasynda Ekologiialyq kodeks pen «Elektr energetikasy týraly» jáne «Jańartylatyn energiia kózderin paidalanýdy qoldaý týraly» Qazaqstan Respýblikasynyń zańdaryna ózgerister men tolyqtyrýlar engizý kózdelgen.
