Jelide Qazaqstanda qoǵamdyq kólikter dezinfektsiialaý kezinde densaýlyqqa qaýipti zattarmen óńdeletini týraly aqparat taratylýda, dep habarlaidy "Ult aqparat" stopfake.kz-ke silteme jasap.
Fotoda qoldanylatyn zattyń qutysy kórsetilgen. «Prodez» dep atalatyn qural Belarýstiń «BelAseptika» zaýytynda shyǵarylady.
QR DSM Taýarlar men kórsetiletin qyzmetterdiń sapasyn baqylaý komiteti bul suiyqtyń Qazaqstanda qoǵamdyq kólikti óńdeý úshin qoldanylatyny týraly qaýesetti teristedi.
«Bul dezinfektsiialyq qural Qazaqstanda tirkelmegen. Bizde qoldanýǵa usynylǵan dezinfektsiialyq zattardyń tizilimi bar, onda «Prodez» joq. Ony elimizdiń birde-bir óńirinde paidalanbaidy», – dep habarlady komitettiń resmi ókili Erjan Baitanaev.
Ol Qazaqstanda qoldanylatyn barlyq dezinfektsiialaý quraly adam úshin qaýipsiz ekenin jáne eritindini daiyndaý úshin usynylatyn proportsiia kórsetilgen qoldaný jónindegi nusqaýlyq bar ekenin atap ótti.
