Qazaqstanda ónimniń otandyq shyǵý tegin rastaý rásimin jeńildetýge jáne biznestiń memlekettik qoldaý sharalary men retteletin satyp alýlarǵa qoljetimdiligin keńeitýge baǵyttalǵan otandyq taýar óndirýshilerdiń tsifrlyq tizilimi iske qosyldy.
Jańa qural iri kásiporyndarmen qatar jas kásipkerlerge, startaptarǵa jáne óndiristi endi bastap jatqan óndirýshilerge de arnalǵan. Tirkeý e-ondiris.gov.kz platformasy arqyly tolyqtai onlain formatta júzege asyrylady, qyzmet tegin kórsetiledi jáne qaǵaz anyqtamalardy jinaýdy talap etpeidi. Júie memlekettik derekqorlarmen integratsiialanǵan jáne óndiristi qysqa merzim ishinde tsifrlyq verifikatsiialaýǵa múmkindik beredi.
Tizilim Memleket basshysynyń tapsyrmasy boiynsha engizildi jáne 2025 jylǵy 19 mamyrda Qazaqstan Respýblikasynyń taýarlardyń shyǵý elin aiqyndaý máseleleri boiynsha zańnamaǵa ózgerister engizý týraly Zań qabyldanǵannan keiin iske asyryldy. Jańa júiege tolyq kóshý 2026 jylǵy 1 qańtardan bastap josparlanǵan. Osy ýaqytqa deiin otandyq óndirýshiler óz mártebesin ST-KZ sertifikattary men indýstriialyq sertifikattar arqyly rastady.
Tizilimge alǵashqylardyń biri bolyp turmystyq tehnika óndiretin «Silk Road Electronics» JShS engizildi. Kásiporyn avtorizatsiiadan sátti ótip, Qazaqstan aýmaǵynda turmystyq tehnika óndirisin júzege asyryp keledi. Kompaniia jergilikti óndiristik qýattardy damytyp, zamanaýi tehnologiialyq sheshimderdi engizýde. Ónim negizinen ishki naryqqa baǵyttalǵan, sondai-aq óńir elderine jetkizý perspektivasy bar.
Tizilimge engizilý kásiporynnyń naqty otandyq taýar óndirýshi mártebesin rastaidy jáne basymdyq beriletin satyp alýlarǵa qatysý men memlekettik qoldaý sharalaryn alý úshin negizgi sharttardyń biri bolyp tabylady. Tekserý óndiristik alańdar, jabdyqtar, jetkizý tizbekteri jáne jergiliktendirý deńgeii týraly tsifrlyq derekter negizinde júrgiziledi.
Resmi derekkózderdiń málimetinshe, qoldanystaǵy indýstriialyq sertifikat ieleriniń 1 800-den astamy júiege avtomatty túrde kóshirilgen, al shamamen 1 000 kompaniia derekterin tsifrlyq formatta rastaǵan.
Tizilimdi paidalaný tolyqtai tegin. Ótpeli kezeń aiaqtalǵannan keiin Tizilimnen beriletin úzindi otandyq ónimniń shyǵý tegin rastaityn jalǵyz qujat bolady.
