WhatsApp qoldanýshylary «Qazaqstanda orys tiliniń resmi mártebesi alynyp tastalatyny» týraly habardy bólisýde. Bul aqparat shyndyqqa janaspaidy, dep habarlaidy "Ult aqparat" StopFake saityna silteme jasap.
Aqparatty Májilis depýtaty Qazybek Isa teriske shyǵardy. Ol Májilis depýtattary Konstitýtsiiadan orys tilin memlekettik tilmen teń qoldaný týraly bapty alyp tastaýdy usynbaǵanyn málimdedi. Halyq qalaýlysy óziniń Facebook paraqshasyndaǵy sózderi konteksten úzip alynǵanyn túsindirgen. Onyń Májilistegi áriptesteri orys tiliniń mártebesin ózgertý týraly usynystar aitpaǵan.
«Negizi bul sózder meniń jazbamnyń konteksinen úzip alynǵanyn habarlaimyn. Ótken sársenbide men depýtattyq saýal jasaǵanda, qazaq tili memleketttik til retinde Konstitýtsiiada bekitilgenimen, osy ýaqytqa deiin Memlekettik til týraly arnaiy zań joq! Óitkeni Konstitýtsiiada kórsetilgen memlekettik statýstyń ómirde iske asýy úshin arnaiy zań qabyldanýy kerek edi.
Sondyqtan da memlekettik organdarǵa qazaq tilinde habarlasqandar sol memlekettik tilde jaýap ala almaityn jaǵdai jii kezdesýde. Óitkeni, memlekettik qyzmetkerlerdiń kóbisi memlekettik tildi bilmeidi, tek orys tilinde sóileidi. Bul jerde 30 jyldan beri ulty qazaq azamattar tildik diskrimantsiiaǵa ushyrap keledi.
Sondyqtan men 2012 jyly “Aq jol” partiiasynyń memlekettik tildiń qoldanylýyn arttyrý jóninde zań jobasyn jasaǵanyn, ony Úkimet toqtatyp tastaǵanyn eske saldym.
Kezekti ret Memlekettik til týraly zań qabyldaýdy usyndyq. Memlekettik til retinde Konstitýtsiiada kórsetilgen statýs sonda ǵana naqty ómirde iske asady.
Mine osy usynysty ózge bir top depýtattar da qoldap, patriottyǵyn kórsetti, olarǵa kóp rahmet!», – dedi Qazybek Isa.
Esterińizge sala keteiik, «Qazaqstan Respýblikasynyń Konstitýtsiiasyna ózgerister men tolyqtyrýlar engizý týraly» zań jobasy 5 maýsymda ótetin respýblikalyq referendýmǵa shyǵarylady. Konstitýtsiialyq túzetýler týraly tolyǵyraq myna jerden oqýǵa bolady.
