WhatsApp قولدانۋشىلارى «قازاقستاندا ورىس تٸلٸنٸڭ رەسمي مەرتەبەسٸ الىنىپ تاستالاتىنى» تۋرالى حاباردى بٶلٸسۋدە. بۇل اقپارات شىندىققا جاناسپايدى, دەپ حابارلايدى "ۇلت اقپارات" StopFake سايتىنا سٸلتەمە جاساپ.
اقپاراتتى مەجٸلٸس دەپۋتاتى قازىبەك يسا تەرٸسكە شىعاردى. ول مەجٸلٸس دەپۋتاتتارى كونستيتۋتسييادان ورىس تٸلٸن مەملەكەتتٸك تٸلمەن تەڭ قولدانۋ تۋرالى باپتى الىپ تاستاۋدى ۇسىنباعانىن مەلٸمدەدٸ. حالىق قالاۋلىسى ٶزٸنٸڭ Facebook پاراقشاسىنداعى سٶزدەرٸ كونتەكستەن ٷزٸپ الىنعانىن تٷسٸندٸرگەن. ونىڭ مەجٸلٸستەگٸ ەرٸپتەستەرٸ ورىس تٸلٸنٸڭ مەرتەبەسٸن ٶزگەرتۋ تۋرالى ۇسىنىستار ايتپاعان.
«نەگٸزٸ بۇل سٶزدەر مەنٸڭ جازبامنىڭ كونتەكسٸنەن ٷزٸپ الىنعانىن حابارلايمىن. ٶتكەن سەرسەنبٸدە مەن دەپۋتاتتىق ساۋال جاساعاندا, قازاق تٸلٸ مەملەكەتتتٸك تٸل رەتٸندە كونستيتۋتسييادا بەكٸتٸلگەنٸمەن, وسى ۋاقىتقا دەيٸن مەملەكەتتٸك تٸل تۋرالى ارنايى زاڭ جوق! ٶيتكەنٸ كونستيتۋتسييادا كٶرسەتٸلگەن مەملەكەتتٸك ستاتۋستىڭ ٶمٸردە ٸسكە اسۋى ٷشٸن ارنايى زاڭ قابىلدانۋى كەرەك ەدٸ.
سوندىقتان دا مەملەكەتتٸك ورگاندارعا قازاق تٸلٸندە حابارلاسقاندار سول مەملەكەتتٸك تٸلدە جاۋاپ الا المايتىن جاعداي جيٸ كەزدەسۋدە. ٶيتكەنٸ, مەملەكەتتٸك قىزمەتكەرلەردٸڭ كٶبٸسٸ مەملەكەتتٸك تٸلدٸ بٸلمەيدٸ, تەك ورىس تٸلٸندە سٶيلەيدٸ. بۇل جەردە 30 جىلدان بەرٸ ۇلتى قازاق ازاماتتار تٸلدٸك ديسكريمانتسيياعا ۇشىراپ كەلەدٸ.
سوندىقتان مەن 2012 جىلى “اق جول” پارتيياسىنىڭ مەملەكەتتٸك تٸلدٸڭ قولدانىلۋىن ارتتىرۋ جٶنٸندە زاڭ جوباسىن جاساعانىن, ونى ٷكٸمەت توقتاتىپ تاستاعانىن ەسكە سالدىم.
كەزەكتٸ رەت مەملەكەتتٸك تٸل تۋرالى زاڭ قابىلداۋدى ۇسىندىق. مەملەكەتتٸك تٸل رەتٸندە كونستيتۋتسييادا كٶرسەتٸلگەن ستاتۋس سوندا عانا ناقتى ٶمٸردە ٸسكە اسادى.
مٸنە وسى ۇسىنىستى ٶزگە بٸر توپ دەپۋتاتتار دا قولداپ, پاتريوتتىعىن كٶرسەتتٸ, ولارعا كٶپ راحمەت!», – دەدٸ قازىبەك يسا.
ەستەرٸڭٸزگە سالا كەتەيٸك, «قازاقستان رەسپۋبليكاسىنىڭ كونستيتۋتسيياسىنا ٶزگەرٸستەر مەن تولىقتىرۋلار ەنگٸزۋ تۋرالى» زاڭ جوباسى 5 ماۋسىمدا ٶتەتٸن رەسپۋبليكالىق رەفەرەندۋمعا شىعارىلادى. كونستيتۋتسييالىق تٷزەتۋلەر تۋرالى تولىعىراق مىنا جەردەن وقۋعا بولادى.
