Almaty qalasynyń Tótenshe jaǵdailar departamenti qysqy maýsymǵa daiyndyqtary men erekshe órt sóndirý tehnikasy týraly aitty, dep habarlaidy "Ult aqparat".
Qalalyq Tótenshe jaǵdailar departamentiniń málimetinshe, 5-6 qarasha aralyǵynda respýblikanyń barlyq aimaǵynda «Qys-2020» shtabtyq jattyǵý ótkizilýde. Shara barysynda Almaty qalasy Tótenshe jaǵdailar departamentiniń ahýaldyq zalynda azamattyq qorǵaý qyzmetteri jáne aýdandyq ákimdiktermen onlain rejiminde qys kezeńinde bolýy múmkin tótenshe jaǵdailardaǵy is-áreketter talqylandy.
Sonymen qatar, departamenttegiler arnaiy jabdyqtalǵan tehnika týraly aityp berdi. Kópmaqsatty órt sóndirý kóligi turǵyn úidi jylýmen úzdiksiz qamtamasyz ete alady. Iaǵni, jylytý qazandyqtyń júktemesin ózine aýystyryp, úidegi jylý júiesiniń qatýyna jol bermeidi.
Mundai tehnika respýblika boiynsha – tórteý.
«Atalǵan avtokólik páterlerdegi jylytý júiesiniń qatýyna múmkindik bermeidi jáne eki kópqabatty turǵyn úidi (60 páterge deiin) jylytýǵa aýystyrý múmkindigi bar. Respýblikada barlyǵy osyndai 4 avtokólik bar, olardyń 2-ýi Almaty qalasy TJD esebinde», - dep atap ótti Almaty qalalyq TJD bastyǵynyń mindetin atqarýshy Erlan Álibekov.
Onyń aitýynsha, qys maýsymyna tehnikalar tolyq daiyn.
«Qysqy kezeńde qalada azamattyq qorǵaý qyzmetteriniń kúshteri men quraldarynyń jeke quramnan 1248 adam, 459 tehnika, 10 jyljymaly toqpen qamtamasyz etý kózderi (dizeldi elektr stantsiialary) daiyn. Qalada qardy tazalaý úshin 1035 birlik kóleminde arnaiy qar jinaityn tehnika,33 myń tonna tehnikalyq tuz, 85 myń tonna qumdy maida tastar ázirlendi», – dedi ol.
