Qazaqstanda otandyq eksporttaýshylarǵa memleket tarapynan qandai qoldaý kórsetiledi? Bul týraly Saýda jáne integratsiia vitse-ministri Qairat Tórebaev tolyǵyraq aityp berdi, dep habarlaidy QazAqparat.
«Saýda jáne integratsiia ministrligi eksporttyq áleýetti arttyrý úshin birshama jospardy bekitti. Atap aitqanda, ónimin eksportqa shyǵarýdy kózdeitin kásiporyndarǵa qoldaý kórsetiledi. 2021 jyldan bastap QazTrade shikizattyq emes taýarlar men qyzmetterdiń eksportyn damytý men saýdalaý jónindegi damý institýty saqtandyrýdy qospaǵanda, barlyq qyzmetti usynady. Odan bólek biyl 10 saýda-ekonomikalyq missiia uiymdastyryp, 2 halyqaralyq kórmege (Shanhai (Qytai), Expo Dubai (Birikken Arab Ámirlikteri)) qatysý kózdelgen. Onyń qorytyndysy boiynsha 100 myń AQSh dollary somasyna 80 eksporttyq kelisimshartqa qol qoiamyz degen oidamyz», - dedi vitse-ministr Saýda jáne integratsiia ministrliginiń alqa otyrysynda.
Sonymen qatar 2021 jyly eksportty ilgeriletý maqsatynda 130 jańa eksporttaýshy syrtqy naryqqa shyǵýdy kózdep otyr. Onyń elýi Alibaba halyqaralyq elektrondy platformasyna engizilmek.
«KazakhExport quraldary sheńberinde eksporttaýshylarǵa 200 milliard teńgege deiin saqtandyrý boiynsha qoldaý kórsetý josparlanyp otyr.
«Ónerkásiptik saiasat týraly» jańa zań sheńberinde otandyq óńdelgen taýarlardy satyp alatyn sheteldik biznes ókilderine qol kórsetiledi. Odan bólek «Qazaqstan Respýblikasynyń eksporttyq-nesielik agenttigi týraly» zań jobasy ázirlenedi. Ol qujat biyl qabyldanyp úlgerer degen úmittemiz», - dedi ol.
